Пра закрыццё пункта пропуску паміж латвійскімі Патарніекамі і беларускай Грыгараўшчынай позна ўвечары 31 ліпеня паведаміў міністр унутраных спраў Латвіі Яніс Домбрава. Паводле яго слоў, прычынай сталі «тэхнічныя праблемы». Прадстаўнікі памежнай службы паведамілі агенцтву LETA, што гаворка ідзе пра аварыю інфармацыйнай сістэмы. З-за гэтага правядзенне памежнага кантролю на пераходзе стала немагчымым.
Пакуль невядома, калі непаладкі будуць ліквідаваныя. Латвійскія ўлады рэкамендуюць грамадзянам вяртацца ў краіну іншымі маршрутамі.
Яшчэ 30 ліпеня міністр Яніс Домбрава заклікаў латышоў адмовіцца ад паездак у Беларусь або вярнуцца дадому, калі яны ўжо знаходзяцца там. Паводле яго слоў, ва ўмовах узмацнення Беларуссю гібрыднай міграцыйнай вайны бяспечнае перамяшчэнне паміж краінамі можа быць ускладнена.
З пачатку гэтага года латвійскія памежнікі прадухілілі каля 9 тысяч спроб незаконнага перасячэння мяжы мігрантамі.
IAR/нг