Сорак літоўскіх пажарных адправіліся ў Францыю. У іх распараджэнні дзевяць спецыялізаваных транспартных сродкаў, у тым ліку пяць пажарных машын. Яны ўзялі з сабой усё неабходнае абсталяванне для тушэння лясных пажараў, сродкі сувязі, ахоўны рыштунак і абсталяванне, якое дазваляе ім самастойна функцыянаваць на месцы здарэння.
Падарожжа зойме прыблізна тры дні. На месцы пажарных сустрэнуць прадстаўнікі грамадзянскай абароны Францыі. Літоўскі кантынгент быў накіраваны ў Францыю ў рамках Механізму грамадзянскай абароны ЕС.
З пацярпелых раёнаў было эвакуявана 220 000 чалавек. Пажары знішчылі больш за 200 дамоў і спалілі больш за 40 000 гектараў лесу.
Таксама пажарныя з Украіны дапамогуць у барацьбе з ляснымі пажарамі ў Францыі. Гэта першы выпадак, калі Украіна далучылася да Механізму грамадзянскай абароны ЕС у якасці краіны-донара. Кіраўнік Еўрапейскай камісіі абвясціў пра гэта на сайце X.
— Абараняючыся ад расійскай агрэсіі, Украіна таксама дапамагае абараняць чалавечыя жыцці па ўсёй Еўропе. Гэта еўрапейская салідарнасць. Кожны дзень Украіна дэманструе, што яна з'яўляецца часткай Еўрасаюза, — падкрэсліла Урсула фон дэр Ляен.
Усяго ў Францыю накіроўваюцца 70 пажарных з Украіны.
У сваю чаргу, польскія пажарныя адправіліся ў Іспанію, каб дапамагчы мясцовым службам у барацьбе з ляснымі пажарамі. З аэрапорта ў Кракаве вылецела першая група з 35 супрацоўнікаў Дзяржаўнай пажарнай службы. Цягам жніўня ў Іспаніі будуць несці службу агулам 105 польскіх пажарных, падзеленых на тры змены.
Яны будуць працаваць у рэгіёне Кастылія — Ла-Манча, у ваколіцах Таледа і Куэнкі. Іх задача — тушыць пажары з зямлі ў цяжкадаступнай мясцовасці без выкарыстання цяжкай пажарнай тэхнікі. Польскія ратавальнікі будуць супрацоўнічаць з іспанскімі калегамі і пажарнай авіяцыяй.
Іспанія цяпер змагаецца з хваляй моцнай спёкі і маштабнымі ляснымі пажарамі, якія ўжо ахапілі дзясяткі тысяч гектараў. Польшча адгукнулася на афіцыйны запыт аб дапамозе ў межах еўрапейскай праграмы ўзаемнай падтрымкі падчас стыхійных бедстваў.
IAR/нг