Перамовы паміж Украінай і Расіяй могуць адбыцца ў Ватыкане, паведаміў Дональд Трамп

Паводле амерыканскага прэзідэнта, Ватыкан зацікаўлены ў арганізацыі перамоваў паміж Украінай і Расіяй.

Ватыкан

PAP/EPA/GIUSEPPE LAMI

Ватыкан зацікаўлены ў арганізацыі перамоваў паміж Украінай і Расіяй, заявіў прэзідэнт ЗША Дональд Трамп пасля размовы з Уладзімірам Пуціным.

«Я думаю, што ўсё прайшло вельмі добра», — падсумаваў Дональд Трамп у сацсетках сваю двухгадзінную размову з Пуціным.

Амерыканскі лідар дадаў, што перамовы паміж Расіяй і Украінай пачнуцца неадкладна і могуць прайсці ў Ватыкане.

Прэзідэнт ЗША запэўніў, што праінфармаваў прэзідэнта Украіны Уладзіміра Зяленскага аб дамоўленасцях з прэзідэнтам Расіі, а таксама, сярод іншых, старшыню Еўракамісіі Урсулу фон дэр Ляен, прэзідэнта Францыі Эмануэля Макрона, прэм'ер-міністра Італіі Джорджыю Мелоні і канцлера Германіі Фрыдрыха Мерца.

Паводле расійскіх дзяржаўных СМІ, Пуцін назваў размову з Трампам «неабходнай і шчырай». Паводле слоў Пуціна, Масква падтрымлівае спыненне баявых дзеянняў, але неабходна выпрацаваць найбольш эфектыўны шлях да міру.

Расія заявіла аб гатоўнасці сумесна з Украінай працаваць над мемарандумам аб спыненні агню. Яна таксама пагадзілася шукаць кампрамісы, якія б задаволілі абедзве краіны.

IAR/аз