Самалёт Dreamliner, які ляцеў з Індыі ў Вялікабрытанію, разбіўся ў Ахмедабадзе неўзабаве пасля ўзлёту. На борце знаходзіліся 242 чалавекі, і паводле афіцыйнай інфармацыі, толькі адзін з іх выжыў, які самастойна пакінуў месца трагедыі. Як такое магчыма? Эксперты называюць некалькі ключавых фактараў - чытаем на старонках Onet.pl.
У катастрофе Dreamliner у Індыі выжыў 38-гадовы грамадзянін Вялікабрытаніі індыйскага паходжання Вішваш Кумар Рамеш. Ён сядзеў на месцы 11A. У інтэрв'ю газеце Hindustan Times ён апісаў катастрофу наступным чынам: «Праз трыццаць секунд пасля ўзлёту я пачуў гучны шум, а потым самалёт разбіўся. Усё адбылося вельмі хутка». І дадаў, што атрымаў раненні, але ўвесь час быў прытомны.
Дзякуючы чаму ён выжыў?
Па-першае, месца ў самалёце (11А). Нягледзячы на тое, што статыстычна сядзенні ў задняй частцы самалёта лічацца больш бяспечнымі ў выпадку аварыі, шмат што залежыць ад вугла ўдару, хуткасці, месца аварыі, тыпу самалёта і г.д. У выпадку катастрофы Dreamliner у Ахмедабадзе пярэдняя частка самалёта магла быць менш пашкоджана.
Па-другое, поза цела ў момант сутыкнення. Праўда, невядома, ці пасажыр прыняў так званую пазіцыю фіксацыі (анг. brace position), калі пашкоджанні можна мінімізаваць. Згодна з артыкулам, апублікаваным у часопісе «Journal of Air Transport Management», гэта спецыяльная ахоўная пазіцыя, якую пасажыры самалёта павінны прыняць у надзвычайнай сітуацыі (напрыклад, перад аварыйнай пасадкай або чаканым сутыкненнем), каб зменшыць рызыку траўмы.
Пасажыр павінен нахіліцца наперад, абаперціся лбом на спінку сядзення перад сабой, пакласці рукі на спінку або закласці іх за галаву, а ступні паставіць роўна на падлогу. Такая поза абараняе галаву і шыю ад удараў, памяншае сілу, якая дзейнічае на пазваночнік, зніжае рызыку траўмаў канечнасцяў і грудной клеткі і дапамагае пазбегнуць удараў галавы аб цвёрдыя часткі салона.
Цікава, што экіпаж самалёта не згадвае пра гэтую позу падчас стандартных інструктажаў па тэхніцы бяспекі і першай дапамогі, бо яна не патрэбная падчас турбулентнасці або звычайнай пасадкі. Аднак, калі ўзнікне надзвычайная сітуацыя, пасажыры пачуюць з гучнагаварыцеляў: «Brace! Brace! Brace!» (Рыхтуйцеся!).
Па-трэцяе, той, хто выжыў, мог сутыкнуцца з «паветранай кішэняй», створанай структурай абломкаў. Яна абараняе ад удараў і агню.
Па-чацвёртае, хуткія выратавальныя дзеянні. Мужчыну хутка знайшлі і неадкладна даставілі ў бальніцу. Гэта значна павялічвае шанцы на выжыванне і зніжае рызыку ўскладненняў.
Перажыць авіякатастрофу — гэта вялікае шанцаванне, але трэба ўлічваць, што пацярпелы атрымаў траўмы, а таксама апёкі і ўдыхаў таксічны дым ад узгарання машыны.
нг