У 2023 годзе экстрэмальныя з'явы былі ўдвая часцейшымі, чым у сярэднім з 2003 па 2020 год.
- Гэта, безумоўна, страшна, — сказаў доктар Мэцью Родэл з NASA газеце Guardian.
- Мы бачым усё больш і больш экстрэмальных з'яў па ўсім свеце, таму гэта трывожна, — дадае яго калега кандыдат навук Бэйлінг Лі.
Нягледзячы на тое, што даследаванне яшчэ не прайшло рэцэнзавання, навукоўцы звяртаюць увагу на змяненне клімату як на галоўнага віноўніка і папярэджваюць, што тэмпы павелічэння экстрэмальных з'яў апярэджваюць тэмпы глабальнага пацяплення. Паводле звестак NASA, інтэнсіўнасць засух і паводак больш моцна карэлюе з павышэннем тэмпературы планеты, чым з Эль-Ніньё ці іншымі фактарамі надвор'я, што сведчыць аб тым, што далейшае пацяпленне прынясе яшчэ больш небяспечныя з’явы.
— Тое, што калісьці было прадказаннем, цяпер адбываецца на нашых вачах, — кажа прафесар Рычард Бэтс з Метэаралагічнага бюро. — Свет не гатовы да такога маштабу змен.
Крыстафер Гасон з Global Water Intelligence папярэджвае, што вадаправодныя кампаніі абсалютна не гатовыя да такіх хуткіх ваганняў: занадта шмат вады ці занадта мала — або і тое, і другое.
— Гэта надзвычай страшна. Патрэбныя велізарныя інвестыцыі, — падкрэслівае ён.
Эксперты таксама папярэджваюць аб так званым «гідракліматычным удары» — рэзкіх пераходах ад засухі да паводкі або ад спёкі да холаду, — якія наносяць хаос сельскай гаспадарцы, інфраструктуры і грамадскаму здароўю. Сусветная метэаралагічная арганізацыя ацэньвае, што ёсць 80-працэнтная верагоднасць таго, што хаця б адзін з наступных пяці гадоў паб’е тэмпературны рэкорд 2024 года.
ав