Гэта рашэнне азначае, што штодзённая тактычная паўза ў ваенных аперацыях, якая ў іншых частках сектара Газа дазваляла дастаўляць гуманітарную дапамогу жыхарам анклава, больш не дзейнічае.
Згодна з заявай ізраільскіх вайскоўцаў, рашэнне было прынята ў сувязі з падрыхтоўкай да прыняцця пад кантроль Газы.
У цяперашні час гэта найбуйнейшы горад у палесцінскім анклаве. Ваенныя пакуль не заклікалі жыхароў да неадкладнай эвакуацыі, хоць прадстаўнік арміі, які размаўляе па-арабску, Авіхай Адрадж сказаў на гэтым тыдні, што насельніцтву «непазбежна» прыйдзецца пакінуць горад.
Паводле ацэнак ААН, у горадзе Газа і навакольных раёнах жыве каля мільёна чалавек. Учора (28 жніўня) інфармацыйнае агенцтва AFP паведаміла пра натоўпы палесцінцаў, якія ўцякаюць з горада на поўдзень на аўтамабілях і грузавіках, нагружаных рэчамі.
Міністр абароны Ізраіля Ізраіль Кац заявіў на мінулым тыдні, што горад Газа будзе знішчаны, калі ХАМАС не пагодзіцца спыніць вайну на ўмовах Ізраіля. Міністэрства абароны таксама ўхваліла план па захопу горада і дазволіла мабілізаваць для гэтай мэты прыблізна 60 тысяч салдат запасу.
Ізраільская армія заявіла, што будзе працягваць падтрымліваць гуманітарныя намаганні, адначасова праводзячы наступальныя аперацыі супраць узброеных груповак у сектары Газа.
Палесцінская грамадзянская абарона паведаміла, што за апошнія 24 гадзіны ў выніку ізраільскіх нападаў па ўсім сектары Газа загінулі 33 чалавекі. Паводле дадзеных Міністэрства аховы здароўя Палесціны, з пачатку ізраільскага наступу ў кастрычніку 2023 года ён забраў жыцці больш за 62 тысячы чалавек, пераважна мірных жыхароў.
IAR/яс