Паводле дадзеных Аўстрыйскай акадэміі навук, пасля абвяшчэння летам гэтага года спецыяльнай стыпендыяльнай праграмы для людзей з дактаратам, ужо 25 даследчыкаў вырашылі прыняць працу ў аўстрыйскіх вышэйшых школах.
Сярод тых, хто пераязджае з ЗША, ёсць прадстаўнікі розных нацыянальнасцяў і дысцыплін. Многія з іх раней працавалі ў вядомых амерыканскіх універсітэтах – такіх, як Масачусецкі тэхналагічны інстытут, Гарвард і Прынстан.
Дактары і прафесары ўжо ў гэтым годзе зоймуць пасады ў чатырнаццаці аўстрыйскіх універсітэтах і навуковых інстытутах. Кожны з іх атрымае фінансаванне ў памеры паўмільёна еўра на чатыры гады.
Арганізатары праграмы падкрэсліваюць: навукоўцам не трэба было тлумачыць, чаму яны адмаўляюцца ад кар’еры ў ЗША. Хоць сама ініцыятыва з’явілася як адказ на палітыку Дональда Трампа, якая, на думку крытыкаў, абмяжоўвала незалежнасць амерыканскіх даследаванняў, аднак даследчыкі маглі зацікавіцца гэтай прапановай і з іншых прычын.
IAR/нг