ЕС і Узбекістан падпісалі Пашыранае пагадненне аб партнёрстве і супрацоўніцтве

Урсула фон дэр Ляен адзначыла, што пагадненне «забяспечвае стабільныя рамкі для сумеснай працы ЕС і Узбекістана дзеля дабрабыту грамадзян абодвух бакоў» і «кансалідуе ўжо моцнае партнёрства».

Прэзідэнт Узбекістана Шаўкат Мірзіёеў (злева), cтаршыня Еўрапейскай камісіі Урсула фон дэр Ляен (справа) і старшыня Еўрапейскага савета Антоніа Коста (злева) вітаюць адзін аднаго перад сустрэчай у Брусэлі, Бельгія, 24 кастрычніка 2025 г.

PAP/EPA/OLIVIER HOSLET

У суботу, 25 кастрычніка, Еўрапейскі Саюз і Узбекістан падпісалі Пашыранае пагадненне аб партнёрстве і супрацоўніцтве — важны этап у развіцці двухбаковых адносін. Як паведамляе Еўракамісія, дакумент адкрывае новы ўзровень стратэгічнага ўзаемадзеяння пасля красавіцкага саміту ЕС–Цэнтральная Азія, які адбыўся ў Самаркандзе.

Старшыня Еўракамісіі Урсула фон дэр Ляен адзначыла, што пагадненне «забяспечвае стабільныя рамкі для сумеснай працы ЕС і Узбекістана дзеля дабрабыту грамадзян абодвух бакоў» і «кансалідуе ўжо моцнае партнёрства».

Welcome to Brussels, President Mirziyoyev!

Uzbekistan is a partner of choice for Europe.

We can rely on each other. In today’s world, this matters more than ever.

We’re making good on our Samarkand Central Asia summit commitment.

And launching a new, stronger 🇪🇺🇺🇿 partnership pic.twitter.com/DEY1H7pegU

— Ursula von der Leyen (@vonderleyen) October 24, 2025

Дакумент стварае новую прававую аснову для паглыблення палітычнага дыялогу і супрацоўніцтва ў шырокім коле сфер: гандлі, інвестыцыях, устойлівым развіцці, адукацыі, навуцы і інавацыях, а таксама ў пытаннях правоў чалавека, вяршэнства права і кіравання крызісамі.

Асобная ўвага надаецца супрацоўніцтву ў галіне знешняй палітыкі, бяспекі і кібербяспекі, а таксама ў доступе да крытычна важных сыравінных рэсурсаў, неабходных для «зялёнага» і лічбавага пераходу ЕС.

ЕС з’яўляецца трэцім па велічыні гандлёвым партнёрам Узбекістана, на яго прыпадае каля 10 % тавараабароту краіны.

PAP/эж