Міністр замежных спраў Турцыі Хакан Фідан папярэдзіў, што Анкара можа быць уцягнутая ў гонку ядзерных узбраенняў, калі Іран атрымае ядзерную зброю, паведаміла ў аўторак агенцтва Bloomberg, якое апісвае інтэрв'ю, якое Фідан даў турэцкамоўнай службе CNN.
«Калі Іран атрымае ядзерную зброю, іншыя не змогуць заставацца абыякавымі», – сказаў Фідан. Ён дадаў, што наступствы гэтай сітуацыі не абмяжуюцца Іранам. Міністр папярэдзіў аб ланцуговай рэакцыі па ўсім Блізкім Усходзе, якая будзе абумоўлена логікай стрымлівання і ўзрастаючым пачуццём пагрозы. Аднак, на думку Фідана, Іран у цяперашні час не працуе над распрацоўкай ядзернай бомбы.
Хоць Турцыя па-ранейшаму выступае супраць распаўсюджвання ядзернай зброі і падтрымлівае дыпламатычнае рашэнне, рэгіянальныя рэаліі могуць прымусіць краіны ў гэтай частцы свету перагледзець свае рашэнні. «Мы не можам чакаць, што краіны будуць проста назіраць», – сказаў турэцкі міністр.
Заявы Фідана прагучалі ў кантэксце намаганняў ЗША перашкодзіць Ірану развіваць свой ядзерны патэнцыял, падкрэсліў Bloomberg.
Спасылаючыся на перамовы паміж ЗША і Іранам, якія адбыліся 6 лютага ў Амане і павінны працягнуцца на гэтым тыдні, Фідан заявіў, што патэнцыйныя авіяўдары «не прывядуць да змены рэжыму» ў Тэгеране. Міністр папярэдзіў, што Блізкі Усход можа не вытрымаць чарговай вайны.
Фідан папярэдзіў, што сумневы ў гатоўнасці Вашынгтона выконваць свае абавязацельствы перад саюзнікамі па НАТА могуць пагоршыць будучую гонку ядзерных узбраенняў у Азіі і Еўропе.
ав