У інтэрв'ю літоўскаму LRT прадстаўнік Вашынгтона заявіў, што гэта будзе выгадна і для ЗША.
— Нам трэба сесці і пагаварыць. Калі не атрымаецца, сыходзьце, — сказаў Коўл у інтэрв'ю, апублікаваным на сайце LRT у пятніцу. Ён падкрэсліў, што «нам трэба пакласці канец гэтым праблемам, якія ўскладняюць жыццё з абодвух бакоў», маючы на ўвазе і Літву, і Беларусь.
Пасланец ЗША адзначыў, што аднаўленне транзіту беларускіх калійных угнаенняў праз Літву таксама будзе выгадным для Вашынгтона.
— Калійныя ўгнаенні з Беларусі павінны транспартавацца праз Літву, што адкрыла б шлях у Еўропу — аж да Злучаных Штатаў, — зазначыў амерыканскі пасланнік.
Паводле слоў Коўла, палітычная сустрэча паміж Літвой і Беларуссю можа адбыцца на ўзроўні намеснікаў міністраў замежных спраў. Пасол ЗША таксама падкрэсліў, што перамовы з аўтарытарным лідарам Беларусі Аляксандрам Лукашэнкам павінны праводзіцца без «папярэдніх умоў».
Прэм'ер-міністр Літвы Інга Ругінене заявіла ў пятніцу, што яе краіна разгледзіць магчымасць сустрэчы з Беларуссю на ўзроўні намеснікаў міністраў, але абумовіла гэта выкананнем Мінскам трох умоў.
Сюды ўваходзяць спыненне адпраўкі метэаралагічных шароў, якія выкарыстоўваюцца для кантрабанды з Беларусі, вяртанне ўсіх канфіскаваных грузавікоў без дадатковых збораў або фінансавых штрафаў і спыненне нелегальнай міграцыі.
— Гаворка ідзе выключна пра тэхнічную сустрэчу, накіраваную на абмен пазіцыямі. Яна можа адбыцца пасля выканання гэтых умоў, — заявіла прэм'ер-міністр у інтэрв'ю грамадскаму вяшчальніку LRT.
Ругінене рашуча адмаўляе, што пытанне транзіту беларускіх угнаенняў праз Літву абмяркоўвалася з Коўлам падчас яго нядаўняга візіту ў Вільнюс.
— Мы ніколі, ні на якім узроўні, не абмяркоўвалі з паслом ЗША транзіт угнаенняў праз Літву. Мы абмяркоўвалі шары, вызваленне грузавікоў і нелегальную міграцыю, — заявіла яна. Прэм'ер-міністр дадала, што транзіт беларускіх угнаенняў праз Літву наогул не можа разглядацца, бо санкцыі ЕС супраць Мінска дзейнічаюць.
Літоўскія СМІ адзначаюць неафіцыйныя чуткі ў палітычных колах пра тое, што Вашынгтон можа ў будучыні дамагацца змякчэння санкцый у дачыненні да беларускіх угнаенняў. Аднак чыноўнікі ў Вільні падкрэсліваюць, што гэта будзе магчыма толькі праз сумеснае рашэнне ЕС.
Транзіт беларускіх калійных угнаенняў праз Літву быў прыпынены 1 лютага 2022 года пасля ўвядзення санкцый ЗША. Прэзідэнт Літвы Гітанас Наўседа недвухсэнсоўна заявіў, што няма гаворкі пра аднаўленне транзіту, пакуль Беларусь працягвае займацца варожай дзейнасцю супраць Літвы, напрыклад, адпраўляць кантрабандныя паветраныя шары.
PAP/яс