Нядзельная аперацыя Злучаных Штатаў стала адказам на папярэднюю атаку Ірану на караблі ў Армузскім праліве. У выніку іранскай атакі загарэўся кантэйнеравоз, а экіпаж быў эвакуяваны.
Армузскі праліў стаў ключавой праблемай у перамовах паміж Злучанымі Штатамі і Іранам аб спыненні вайны.
Цэнтральнае камандаванне ЗША абвясціла, што ў выніку аперацыі было пашкоджана больш за 140 цэляў — значна больш, чым падчас двух папярэдніх серыяў атак, у тым ліку ракетныя і беспілотныя пускавыя пляцоўкі, склады боепрыпасаў і камунікацыйная інфраструктура.
Амерыканцы выкарыстоўвалі высокадакладныя боепрыпасы, якія запускаліся з караблёў, а таксама з самалётаў і беспілотнікаў, якія базуюцца на сушы і моры. Цэнтральнае камандаванне арміі ЗША падкрэсліла, што рух суднаў праз міжнародны суднаходны калідор працягваецца. У амерыканскай заяве гаворыцца, што абстрэл абмяжоўвае магчымасці Ірану атакаваць цывільных маракоў і камерцыйныя судны, якія свабодна праходзяць праз праліў.
Іран заявіў, што ў адказ на атаку ён пачаў удары па амерыканскіх абʼектах на Блізкім Усходзе. Міністэрства абароны Абʼяднаных Арабскіх Эміратаў і Катара абвясцілі, што яны перахопліваюць запушчаныя ў іх бок ракеты.
Іранская рэвалюцыйная варта паведаміла пра ўдар па амерыканскіх авіяносных пунктах падтрымкі і запраўкі ў порце Дукм у Амане. Раней зʼявілася інфармацыя пра ўдары па амерыканскай авіябазе Аль-Удэйд у Катары. Іран заявіў, што дадзеныя атакі сталі помстай за амерыканскія ўдары па Іране. Паводле звестак Рэвалюцыйнай вартай, знішчаны камандны цэнтр базы і пункт тэхнічнага абслугоўвання знішчальнікаў.
ПР/юл