Пра Ігара Лосіка піша ў «Gazeta Wyborcza» Ганна Малашэня. Блогер і журналіст ужо чатыры месяцы ўтрымліваецца ў ізаляцыі ў жудасных умовах у Жодзіне, – кажа ягоная жонка Дар'я Лосік. Ігар, адміністратар тэлеграм каналу «Беларусь галаўнога мозгу», быў затрыманы ў Баранавічах 25 чэрвеня, абвінавацілі яго ў арганізацыі масавых пратэстаў. Яго трымаюць у камеры ў падвале, памер камеры не дазваляе зрабіць нават некалькі крокаў. Можна толькі сядзець або стаяць, днём забараняюць ляжаць, пагражаючы карцарам, акно закрыта металічным лістом. Хаця там вільготна і холадна, нельга мець цёплыя рэчы. Псіхічны стан Ігара пагаршаецца. Жонка высылае яму здымкі іх двухгадовай дачушкі і кожны тыдзень едзе ў Жодзіна даць перадачу. Дарʼя кажа: «Я вельмі хвалююся за Ігара і я хацела б яго замяніць у гэтай камеры, аднак, на жаль, гэта немагчыма».
Сённяшняя «Gazeta Wyborcza» піша таксама пра страйкі на беларускіх прадпрыемствах, асабліва на МАЗ-е і «Гродна Азот», пра адлічэнні студэнтаў і звальненні выкладчыкаў, пра затрыманні пасля маршаў у нядзелю і панядзелак.
яс