У наступным годзе ў войска могуць прызваць да 200 тысяч жаўнераў запасу. У гэтую групу ўвойдуць і тыя, хто раней ніколі не апранаў вайсковай формы, паведамляе Rzeczpospolita.
Газета нагадвае, што вучэнні жаўнераў запасу могуць мець розны характар і працягласць. Яны могуць быць: аднадзённыя, кароткатэрміновыя, доўгатэрміновыя, бесперапынныя або ратацыйныя.
«Працягласць вучэнняў вайскоўцаў запасу залежыць ад дасягнення пастаўленых мэт падрыхтоўкі», – дадае падпалкоўнік Юстына Балік з Цэнтральнага ваенкамату. Яна падкрэслівае, што армія мяркуе, што сярэдняя працягласць вучэнняў не будзе перавышаць сямі дзён. Аднак пра працягласць вучэнняў, на самой справе, вырашаюць камандзіры вайсковых падраздзяленняў.
Газета паведамляе, што на вучэнні могуць быць прызваныя жаўнеры запасу са спецыяльнымі кваліфікацыямі, карыснымі для ўзброеных сіл, напрыклад, IT-спецыялісты, лекары, ветэрынары, кіроўцы катэгорый C і D. «У іх выпадку, хутчэй за ўсё, вайсковыя вучэнні будуць адбывацца ў выходныя дні», – паведамляе Юстына Балік.
За кожны дзень удзелу ў вучэннях жаўнер запасу атрымлівае кампенсацыю страчанага ўзнагароджання.
У мінулыя гады адной з мэтаў такіх прызываў была перападрыхтоўка жаўнераў для выконвання новых вайсковых задачаў, паведамляе Rzeczpospolita.
аз