Польская пракуратура пачала расследаванне катастрофы знішчальніка F-16 ВПС Польшчы, якая здарылася ў горадзе Радам у 100 км ад Варшавы. Паводле слоў прадстаўніка Варшаўскай акруговай пракуратуры, расследаванне праводзіцца па прычынах авіяцыйнага здарэння, у выніку якога загінуў чалавек.
Пракурор Антоні Скіба, прэс-сакратар Варшаўскай акруговай пракуратуры, паведаміў на прэс-канферэнцыі, што ў пятніцу было распачатае расследаванне катастрофы F-16 у Радаме. «Яно праводзіцца ў адпаведнасці з артыкулам 173-м, пунктамі 2-м і 4-м, у якіх гаворыцца пра авіяцыйную катастрофу са смяротнай ахвярай», – сказаў ён. Пракурор дадаў, што для правядзення праверкі на базе ў Радаме накіраваныя 14 следчых з вайсковай пракуратуры. Скіба сказаў, што невядома, колькі працягнуцца следчыя мерапрыемствы. Прэс-сакратар таксама зазначыў, што правяраецца дакументацыя самалёта і адносна пілота, які загінуў у катастрофе. Апытаныя першыя сведкі: члены наземнага персаналу на ваенна-паветранай базе ў Познані, дзе базаваўся самалёт, і галоўны тэхнік самалёта.
Загінулы 35-гадовы пілот, маёр Мацей «Слаб» Кракавян. Здымак з 21 жніўня 2025 года. Крыніца: PAP/Piotr Polak
Пракурор таксама паведаміў пра знойдзены бартавы самапісец. «Яго забралі прадстаўнікі Дзяржаўнай камісіі па расследаванні авіяцыйных здарэнняў. У бліжэйшы час спецыялісты правядуць аналіз самапісца з удзелам прадстаўніка пракуратуры. Пакуль невядома, дзе будуць праводзіцца гэтыя даследаванні. Хутчэй за ўсё, за межамі Рэспублікі Польшча», – сказаў ён. Пракурорскі чыноўнік таксама дадаў, што «цела загінулага пілота знойдзенае». «Яно было дакладна агледжанае і дастаўленае ў цэнтр судова-медыцынскай экспертызы ў Варшаву, дзе будуць праведзены ўсе неабходныя, вельмі падрабязныя даследаванні», – сказаў ён.
Увечары ў чацвер, 28 жніўня, падчас рэпетыцыі перад авіяшоў у аэрапорце Радама разбіўся знішчальнік F-16. Самалёт упаў і разбіўся аб узлётна-пасадачную паласу. У катастрофе загінуў 35-гадовы пілот, маёр Мацей «Слаб» Кракавян. У яго засталіся жонка і двое дзяцей. Міжнароднае авіяшоу павінна было адбыцца ў аэрапорце Радама 30 і 31 жніўня. Міністр нацыянальнай абароны Уладзіслаў Касіняк-Камыш паведаміў, што з-за трагедыі сёлетняе шоу адмененае. Гэта першая катастрофа самалёта F-16 у Польшчы.
вс