Суды, якія выносяць рашэнні аб спагнанні аліментаў, атрымаюць доступ да электронных баз дадзеных, такіх як: база дадзеных Упраўлення сацыяльнага страхавання (ZUS) і Сельскагаспадарчага фонду сацыяльнага страхавання (KRUS), рэестр транспартных сродкаў і зямельны рэестр. Таксама будзе створана электронная форма заявы для паскарэння спагнання такіх даўгоў, паведаміў Dziennik Gazeta Prawna.
Намеснік міністра юстыцыі Славамір Палка ў інтэрв'ю газеце заявіў, што ў Міністэрстве юстыцыі была створана адмысловая міжведамасная каманда.
«Задача гэтай каманды – распрацаваць рашэнні, накіраваныя на павышэнне ўзроўню спагнання аліментаў. Інстытут правасуддзя неўзабаве правядзе даследаванні і аналізы, неабходныя для распрацоўкі адпаведных заканадаўчых рашэнняў», – паведаміў палітык.
Паводле звестак газеты, зараз распрацоўваюцца дзве мадэлі працэдур выдачы пастановы аб спагнанні аліментаў. Таксама пачалася праца над распрацоўкай электроннай заявы для пазоваў аб спагнанні аліментаў.
«Мы хацелі б, каб суды мелі магчымасць правяраць рэальныя актывы і ўзровень даходу, як тых, хто абавязаны плаціць аліменты, так і тых, хто мае права на такія выплаты», – сказаў Славамір Палка.
Нявыплата аліментаў – гэта сур’ёзная праблема ў Польшчы. На кастрычнік бягучага года, запазычанасць па аліментах, на падставе рэестру даўжнікоў BIG InfoMonitor, складала амаль 17 мільярдаў злотых. Гэта на 800 мільёнаў злотых больш, чым годам раней.
У базе дадзеных BIG InfoMonitor па нявыплачаных аліментах зарэгістравана амаль 288 500 бацькоў. У сярэднім на аднаго даўжніка па аліментах прыпадае 58 600 злотых запазычанасці.
Найбольшая доля даўжнікоў па аліментах ад агульнай колькасці насельніцтва назіраецца ў Вармінска-Мазурскім ваяводстве. Найвышэйшая сярэдняя запазычанасць зафіксавана ў Мазавецкім ваяводстве – гэта 65 309 злотых.
За апошнія чатыры гады запазычанасць па аліментах у Польшчы павялічылася на 66%.
аз