Урад Польшчы ўхваліў законапраект, які істотна мяняе правілы знаходжання і працаўладкавання грамадзян Украіны. Змены закрануць амаль мільён украінцаў і тысячы польскіх працадаўцаў. Акт адмяняе частку надзвычайных рашэнняў, уведзеных пасля пачатку вайны, аб чым піша Businessinsider.
Законапраект уключае пераходныя палажэнні, важныя для стабільнасці рынку працы. Раней пададзеныя паведамленні захаваюць юрыдычную моц, а цягам трох гадоў новыя паведамленні змогуць датычыцца не толькі асоб з часовай абаронай, але і ўсіх украінцаў, якія легальна знаходзяцца ў Польшчы. Таксама праект упарадкоўвае доступ украінцаў да медыцынскай дапамогі, сацыяльных выплат, жылля і харчовай дапамогі.
«Гэты законапраект паступова адмяняе спецыяльныя меры пасля пачатку вайны ва Украіне. (...) Большасць людзей, якія пражываюць у Польшчы, працуюць, іх дзеці вучацца ў школе, таму цяпер можна паступова адмяніць гэтыя надзвычайныя правілы і перайсці ад часовых рашэнняў да сістэмных, і гэты закон уводзіць такія рашэнні для функцыянавання тут, на польскай тэрыторыі», — сказаў прэс-сакратар урада Адам Шлапка, якога цытуе Biznes.interia.
Ён дадаў, што, на яго думку, новыя рашэнні лепшыя, таму што яны заахвочваюць пастаяннае або часовае пражыванне.
Закон аб дапамозе, які дзейнічае з 2022 года, стварыў асобную прававую сістэму, якая спрашчае правілы пражывання, працы, выплат і адукацыі для ваенных бежанцаў з Украіны. Законапраект, прыняты ў аўторак, мае на мэце ўвесці агульную сістэму часовай абароны для ўсіх замежнікаў.
нг