Алесь Бяляцкі: Захад не можа адмовіцца ад ціску на рэжым

Лаўрэат Нобелеўскай прэміі міру нагадвае, што Расія выкарыстоўвае Беларусь для правядзення варожых дзеянняў супраць Польшчы, Літвы і Латвіі.

Алесь Бяляцкі ў 2014 годзе быў госцем Польскага радыё.

Фота: Wojciech Kusiński/Polskie Radio

Хоць улады Беларусі вызваляюць палітычных зняволеных, рэпрэсіі працягваюцца, а Расія надалей выкарыстоўвае Беларусь для правядзення варожых дзеянняў супраць Польшчы, Літвы і Латвіі, кажа ў інтэрв’ю агенцтву PAP лаўрэат Нобелеўскай прэміі міру, кіраўнік праваабарончага цэнтра «Вясна» Алесь Бяляцкі. Ён лічыць, што за паўгода з часу яго вызвалення ў Беларусі нічога не змянілася — беларусаў пазбаўляюць волі за палітычныя погляды, сімвалічную падтрымку Украіны або за «старыя грахі».

— За тое, што яны зрабілі пяць ці шэсць гадоў таму. Службы шукаюць у сацсетках, і калі знаходзяць якія-небудзь фотаздымкі ці паведамленні, якія яны лічаць пагрозлівымі для ўрада — арыштоўваюць людзей, якія іх размясцілі. Мы бачым усё больш такіх выпадкаў. Што тычыцца адносін з Расіяй, то Лукашэнка працягвае дапамагаць Пуціну. Расія працягвае выкарыстоўваць тэрыторыю Беларусі для правядзення варожых аперацый супраць Украіны, Польшчы і Літвы. «Уварванне» мігрантаў у гэтыя краіны працягваецца. Усё сведчыць аб тым, што «атакамі» на мяжы кіруе беларускае КДБ, — кажа Бяляцкі.

Паводле яго, Лукашэнка працягвае гуляць у сваю гульню. Пасля ўльтыматуму Зяленскага (прэзідэнт Украіны запатрабаваў ад уладаў у Мінску адключыць перадатчыкі і станцыі, якія выкарыстоўваюцца для кіравання расійскімі беспілотнікамі — PAP), ён спрабуе лавіраваць паміж Расіяй і Украінай.

— Лукашэнка робіць усё магчымае, каб не дапусціць перакідання «гарачай» вайны ў Беларусь, бо разумее, што гэта скончыцца катастрофай для рэжыму. Беларуская армія не зможа адбіць атаку ўкраінскіх беспілотнікаў. А калі б Украіна напала на беларускую інфраструктуру, эканоміка, якая ўжо перажывае цяжкасці, развалілася б. Вінаваты будзе цалкам Лукашэнка, і ён страціць тую невялікую падтрымку, якую мае, — кажа праваабаронца.

Алесь Бяляцкі не бачыць ніякіх зменаў, калі гаворка ідзе пра рэпрэсіі, а рэжым надалей спрабуе «гандляваць» палітычнымі зняволенымі з адміністрацыяй Дональда Трампа.

— Перамовы з амерыканцамі ўсё яшчэ працягваюцца, але пакуль што яны не далі ніякіх канкрэтных вынікаў. Я чакаю, што неўзабаве будзе вызвалена вялікая колькасць палітвязняў, але спадзяюся, што Польшча не паддасца гэтым жэстам для паказухі. Захад павінен працягваць сваю жорсткую палітыку ў дачыненні да Лукашэнкі. Хто, як не вы, можа пераканаць краіны ЕС, што ў Беларусі пануе сталінскі рэжым? У нас тыя ж праблемы, што і ў палякаў паўстагоддзя таму(…) Я шмат падарожнічаў па Еўропе, дзе правёў шмат важных сустрэч, спрабуючы прыцягнуць увагу еўрапейскай грамадскай думкі да таго, што адбываецца ў Беларусі. Было б катастрафічна, калі б свет забыўся пра нас. На жаль, сусветная грамадская думка сканцэнтравана на вайне ва Украіне і напружанай сітуацыі на Блізкім Усходзе. Нашы праблемы адыходзяць у цень гэтых буйных падзей. Маё пасланне зразумелае — Захад не можа адмовіцца ад ціску на рэжым, дэмакратычныя дзяржавы павінны патрабаваць вызвалення ўсіх беларускіх палітвязняў. Без ціску на Лукашэнку рэпрэсіі будуць працягвацца, — кажа ў размове з агенцтвам PAP лаўрэат Нобелеўскай прэміі міру, кіраўнік праваабарончага цэнтра «Вясна» Алесь Бяляцкі.

PAP/аз