Згодна з вынікамі апытання «Барометр Provident», больш за чвэрць палякаў імкнуцца мець большыя запасы прадуктаў, чым некалькі гадоў таму. Пры гэтым, спажыўцы аддаюць перавагу разумнай падрыхтоўцы да нечаканых падзей, а не вялікім запасам прадуктаў — паведамляе «Forsal».
Паводле вынікаў апытання, 27,8% рэспандэнтаў паведамляюць, што захоўваюць больш прадуктаў, чым раней, прычым 11% робяць значна большыя запасы. У той жа час 46,9% апытаных не змянілі свайго падыходу да захоўвання ежы, а 10,7% — скарацілі свае запасы.
Даследаванне таксама паказвае, што вялікая колькасць хатніх гаспадарак мае невялікі запас ежы — адна трэцяя мае запас максімум на тыдзень. Пажылыя людзі падрыхтаваныя найлепш. Сярод асоб ва ўзросце 65 гадоў і старэйшых больш за палову маюць запасы, разлічаныя на больш чым два тыдні, у той час як сярод людзей ва ўзросце ад 25 да 34 гадоў пра наяўнасць такіх запасаў паведамляюць менш за 29% апытаных.
Рост цэн на прадукты застаецца найбольш значным фактарам, які ўплывае на рашэнне запасціся ежай. Значную ролю адыгрываюць таксама заклапочанасць якасцю прадуктаў, нестабільная міжнародная сітуацыя, экстрэмальныя прыродныя з'явы і агульнае пачуццё нестабільнасці будучыні.
Аўтары даследавання адзначаюць, што палякі падыходзяць да пытання харчовай бяспекі прагматычна. Амаль 82,6% апытаных лічаць мэтазгодным мець дома запас асноўных прадуктаў на выпадак непрадбачаных сітуацый. Аналагічная доля апытаных адзначае перавагі самастойнага вырошчвання прадуктаў харчавання, а больш за 73 адсоткі разглядаюць хатнія нарыхтоўкі як фактар, які ўмацоўвае бяспеку.
Апытанне «Барометр Provident» было праведзена кампаніяй Danae метадам CAWI сярод 1005 дарослых палякаў у жніўні 2026 года.
нг