Бітва пад Воршай была найбуйнейшай бітвай вайны Маскоўскай дзяржавы з Вялікім Княствам Літоўскім 1512–1522 гадоў паміж літоўскім і маскоўскім войскамі на рацэ Крапіўне, за 5 км ад Воршы.
Аршанская бітва – адна з найбуйнейшых бітваў на тэрыторыі Еўропы ў пачатку XVI стагоддзя. Перамога ў ёй дала Вялікаму Княству Літоўскаму магчымасць вярнуць захопленыя праціўнікам Дуброўна, Амсціслаў і Крычаў. Перамога пад Воршай разглядаецца як адна з першых у шэрагу трыумфаў беларускай зброі – Сінія Воды, Грунвальд, Кірхгольм, бітва пад Клецкам (Вікіпедыя).
Гісторык, грамадскі актывіст, дзеяч БХД Яўген Дудкін адзначае, што гадавіна Бітвы пад Воршай – гэта прыклад майстэрства беларусаў ваяваць за сваю Бацькаўшчыну.
Нездарма яе называюць Днём вайсковай славы, паколькі яна дапамагла захаваць дзяржаўнасць і незалежнасць ВКЛ:
-І што самае цікавае: геапалітычны падзел, які мусіў адбыцца ў выпадку паражэння ВКЛ і яго саюзнікаў. Гэтая падзея паказвае, што бываюць моманты, калі ў меншасці ёсць пагроза страціць усё. Але з іншага боку арганізаванасць, прафесійнасць, кампетэнтнасць гавораць пра тое, што заўжды можна перамагчы, калі рабіць сваю справу прафесійна. Беларускае войска, яно ж войска ВКЛ, зрабіла ўсё магчымае, каб правільна спланаваць бой і пераняць ініцыятыву ў бітве.
Яўген Дудкін лічыць, што Дзень беларускай вайсковай славы варта святкаваць беларусам. Адначасова варта звярнуць увагу на новае войска:
- Сёння, калі за мяжой жыве мноства беларусаў, важна мець магчымасць удзельнічаць у рознага кшталту імпрэзах, дзе будуць спяваць песні на хвалу войска ВКЛ. Важна цяпер звярнуць увагу і на новае войска, якое зараз фармуюць ва Украіне. Звярнуць увагу на іншыя патрыятычныя злучэнні, як «Паспалітае рушэнне». Да святкавання варта запрашаць і нашых суседзяў – украінцаў, палякаў, літоўцаў – каб узгадваць гэтую важную падзею, якая прадухіліла захоп Масквой Усходняй Еўропы і падзел яе з імператарам Рымскай Імперыі.
8 верасня 1992 году грамадскае аб’яднанне Беларускі народны фронт «Адраджэнне» зладзіла першае святкаванне Дня беларускай вайсковай славы на плошчы Незалежнасці ў Мінску. Свята таксама адзначылі ў Брэсце, Гродне і іншых гарадах Беларусі. У гэты дзень грамадскае аб’яднанне «Беларускае згуртаванне вайскоўцаў» зладзіла масавае прыняцце 12 афіцэрамі і 3000 жаўнерамі прысягі на вернасць Беларусі.
-Гэта спроба патрыятычных афіцэраў стварыць свята, якое магло б стаць ідэалагічнай асновай, якое паказала б традыцыю святкавання гэтай падзеі. На мой погляд, гэты дзень мог бы ідэальна падысці як дзень прыняцця прысягі нашымі жаўнерамі, – кажа Яўген Дудкін.
У Варшаве святкаванне Дня вайсковай славы пройдзе на некалькіх пляцоўках: у Беларускім доме, Музеі Вольнай Беларусі, на пляцоўцы перад Беларускім моладзевым хабам.
Поўная размова ў далучаным гукавым файле.
слухайце аўдыё