Лес небаскробаў на Ронда Дашынскага ў цэнтры Варшавы становіцца ўсё гусцейшым, піша Gazeta Wyborcza.
Усяго ў гэтым комплексе шматпавярховікаў будзе пабудавана 140 000 квадратных метраў офісаў, 11 000 квадратных метраў крамаў, 430 нумароў у двух гатэлях і 570 кватэр у двух высотных будынках. А 130-метровы хмарачос Skyliner II практычна знікне сярод іншых будынкаў.
Skyliner II — унікальны будынак. У іншых гарадах небаскроб такой вышыні быў бы дамінантай краявіду. Але на Ронда Дашынскага ён размешчаны ў такой гушчы будынкаў, што будзе практычна нябачны.
Будаўніцтва яго пяціпавярховай падземнай часткі заняло амаль год. Яшчэ ў пачатку 2025 года будынак быў ледзь вышэй за ўзровень зямлі.
Але пасля завяршэння падземнай часткі будаўніцтва рэзка паскорылася — за дзевяць месяцаў канструкцыя дасягнула вышыні 65 метраў. Цяпер яна знаходзіцца напалову ад запланаванай вышыні. Кожны новы паверх дабудоўваецца за пяць дзён. Небаскроб дасягне сваёй поўнай вышыні праз тры месяцы.
Панарамныя віды і зялёныя тэрасы
«Адна з ключавых пераваг небаскробаў — гэта захапляльныя панарамы, таму ў Skyliner II мы хацелі, каб куты будынка былі максімальна адкрытымі», — тлумачыць архітэктар Міхал Садоўскі. Калоны былі адсунуты далей ад кутоў, што дазволіла інтэр'ерам атрымаць больш святла і захапляльны від на Варшаву.
Яшчэ адной асаблівасцю новага варшаўскага небаскроба стануць зялёныя тэрасы на верхніх паверхах. Яны будуць мець агульную плошчу амаль 900 квадратных метраў.
Завяршэнне ўсіх будаўнічых работ па Skyliner II запланавана на канец 2026 года. Падземная частка небаскроба будзе злучана са станцыяй метро.
яс