За апошні год колькасць замежнікаў, падазраваных ва ўдзеле ў арганізаванай злачыннасці, павялічылася амаль удвая, паведамляе Rzeczpospolita са спасылкай на справаздачу Цэнтральнага бюро расследаванняў паліцыі за 2025 год. З яе вынікае, што ў ліку падазраваных былі 265 замежнікаў. 80% з іх былі рускамоўнымі. Годам раней было 184 асобы. Што тычыцца выхадцаў з краін, дзе адной з моў з'яўляецца расійская, іх было 216 у параўнанні са 149 у 2024 годзе.
Зламыснікаў абвінавачвалі ў здзяйсненні такіх злачынстваў, як незаконны абарот наркотыкаў, кантрабанда і выраб цыгарэт, напады, рабаванні, махлярствы і акцызныя правапарушэнні. Яны былі здзейснены ў складзе злачынных груп.
Статыстыка, якую прыводзіць выданне, паказвае, што асаблівую занепакоенасць выклікае хуткі рост колькасці падазраваных з Беларусі (павелічэнне амаль у чатыры разы) і Арменіі (павелічэнне ў два разы). Кожная нацыя мае сваю спецыфіку. Беларусы займаюцца кантрабандай цыгарэт, часта выкарыстоўваючы метэаралагічныя шары, што, акрамя прыбытку, зʼяўляецца іх удзелам у гібрыднай вайне. Грузінскія банды, з іншага боку, у асноўным асацыююцца з узломам і крадзяжамі раскошных гадзіннікаў або дыяментаў. Украінцы ж часта стаяць за банкаўскімі махлярствамі, кіруючы кол-цэнтрамі прама з Кіева ці Адэсы.
— Усходнюю злачыннасць становіцца ўсё цяжэй выявіць. Акрамя жорсткіх вулічных акцый, пра якія часцей за ўсё паведамляюць, гэтыя групоўкі ўдзельнічаюць у кіберзлачыннасці, гандлі людзьмі і складаных эканамічных і мытных махлярствах, — папярэджвае Томаш Сафʼянскі (Tomasz Safjański) — былы паліцэйскі і прафесар Акадэміі WSB (Вышэйшая школа бяспекі).
нг