У Польшчы аплата медычных паслуг ажыццяўляецца наступным шляхам: бальніца падпісвае кантракт з лекарамі на выкананне паслуг, лекары выстаўляюць рахункі бальніцы, а бальніца атрымлівае сродкі на аплату за гэтыя паслугі з Нацыянальнага фонду аховы здароўя (NFZ).
26 000 злотых (амаль 6200 еўра за адну гадзіну працы) і больш за 300 тысяч злотых (71,5 тысячы еўра) за дзень — такія рахункі выставіла бальніцам суполка нейрахірургаў. Дактары праводзілі працэдуры, якія доўжыліся ўсяго некалькі хвілін, але, паводле звестак Нацыянальнага фонду аховы здароўя, у дакументацыю яны запісвалі больш дарагія працэдуры, паведаміў сайт Wirtualna Polska.
Адной з бальніц, якая заключыла кантракт з суполкай нейрахірургаў, з'яўляецца бальніца ў Магільне ў Куяўска-Паморскім ваяводстве.
— Лекары бралі 65% ад таго, што аплачваў Нацыянальны фонд аховы здароўя (NFZ) за кожную працэдуру. Па суботах яны праводзілі дзясяткі працэдур, кожная з якіх, паводле дакументацыі, доўжылася ад 3 да 10 хвілін. Паводле NFZ, у іх дакументацыі была пазначана працэдура ў чатыры разы даражэйшая, якую яны не маглі выканаць за такі кароткі час, — паведамляе партал.
Паводле звестак сайта Wirtualna Polska, Нацыянальны фонд аховы здароўя (NFZ) завяршыў праверку ў траўні, выявіў парушэнні і наклаў вялікі штраф на бальніцу ў Магільне. Кіраўніцтва шпіталя паведаміла, што ў ліпені не мае сродкаў на выплату заробкаў супрацоўнікам.
Як паведамляе партал, суполка нейрахірургаў вяла падобную дзейнасць у бальніцы ў Мястко (Паморскае ваяводства), дзе NFZ і Цэнтральнае антыкарупцыйнае бюро (CBA) расследуюць справу пад наглядам пракуратуры.
— Стварэнне фіктыўных бальнічных запісаў было выкарыстана для махлярства і выманьвання грошай з Нацыянальнага фонду аховы здароўя, — заявіў ваяводскі кансультант, якога цытуе Wirtualna Polska. — Маштаб магчымага махлярства ў адной з бальніц ацэньваецца ў 13 мільёнаў злотых» (больш за 3 мільёны еўра), — дадаў кансультант у сваёй заяве.
яс