49-гадовы бразільскі муляр Эдзімар Марцінс (Edimar Martins) прадаў усю сваю маёмасць і праехаў больш за дзве тысячы кіламетраў, каб сустрэцца з жанчынай, у якую закахаўся праз інтэрнэт, аб чым піша выданне Onet. Аднак высветлілася, што прыгажуня Жэсіка Алівера (Jéssikа Oliverа), якая абяцала яму сумеснае жыццё на ферме, — персанаж, створаны штучным інтэлектам.
Пасля смерці маці Марцінс вырашыў пачаць жыццё нанова. Ён паверыў, што ўладальніца фермы з бразільскага горада Белу-Арызонці шукае партнёра, які будзе дапамагаць ёй весці гаспадарку. Жанчына нібыта абяцала забяспечваць яго матэрыяльна.
— Я ўсё прадаў, пазбавіўся ўсяго, — расказаў мужчына тэлеканалу TV Mirante.
9 кастрычніка ён адправіўся ў дарогу з горада Імператрыс. Праз два дні прыбыў у Белу-Арызонці, але знайсці Жэсіку не змог. Калі скончыліся грошы, звярнуўся па дапамогу на мясцовую радыёстанцыю.
Журналісты праверылі інфармацыю. Аказалася, што Жэсіка — віртуальны персанаж, створаны з дапамогай штучнага інтэлекту. Мужчыне дапамаглі вярнуцца дадому: муніцыпалітэт аплаціў яму зваротны білет.
Акаўнт Жэсікі ў TikTok мае больш за 300 тысяч падпісчыкаў. Яго стваральнік прызнаў, што выкарыстоўваў штучны інтэлект, каб прыцягнуць аўдыторыю і зарабляць на рэкламе і продажы тавараў. Пры гэтым ён адмаўляе, што асабіста кантактаваў з Марцінсам.
Псіхолагі папярэджваюць, што адносіны са штучным інтэлектам могуць фарміраваць нерэалістычныя чаканні ад сапраўдных партнёраў. Віртуальныя суразмоўцы заўсёды даступныя, падтрымліваюць размову, што спрыяе эмацыйнай прывязанасці.
Паводле бразільскіх СМІ, выпадак Марцінса не адзінкавы. За апошнія паўгода ў Белу-Арызонці прыехалі як мінімум трое мужчын, якія спадзяваліся сустрэцца з жанчынамі, з якімі пазнаёміліся ў інтэрнэце. У відэароліках тыя прадстаўляліся заможнымі землеўласніцамі, якія шукалі партнёраў або прапаноўвалі працу.
Марцінс прызнаецца, што адчувае сябе падманутым і лічыць, што закон павінен лепш абараняць людзей ад падобных сітуацый. Аднак расчараванне не прымусіла яго адмовіцца ад пошуку кахання.
— Я не знайшоў Жэсікі, але знайду іншую. Зноў паеду туды, — заявіў бразілец.
нг