Адначасова Дзяржаўны дэпартамент абвясціў аб прыпыненні выдачы віз грамадзянам Афганістану.
«USCIS прыпыніла ўсе рашэнні аб прадастаўленні прытулку, пакуль мы не зможам гарантаваць, што кожны замежнік будзе правераны ў максімальна магчымай ступені, – сказаў Эдлоу ў заяве для СМІ ў пятніцу. – Бяспека амерыканскага народу заўсёды на першым месцы».
Паводле CBS, гэтае рашэнне азначае, што, хоць апрацоўка пададзеных заявак аб прадастаўленні прытулку будзе працягвацца, канчатковыя рашэнні па гэтых справах былі прыпыненыя. У той жа дзень Дзяржаўны дэпартамент ЗША абвясціў, што выдача віз грамадзянам Афганістана таксама была прыпынена.
«У Злучаных Штатаў няма вышэйшага прыярытэту, чым абарона нашай краіны і нашых грамадзян», – абвясціў дзяржаўны сакратар ЗША Марка Рубіа ў эфіры «Платформы X».
Як паведамляе Радыё Свабода са спасылкаю на ініцыятыву byaction.org, якая ў ЗША падтрымлівае беларусаў, пацярпелых на радзіме ад палітычных рэпрэсіяў, на пачатак 2025 года ў Праекце абароны шукальнікаў прытулку (некамэрцыйная арганізацыя Asylum Seeker Advocacy Project) зарэгістраваныя 1662 беларусы.
Рашэнні звязаны з нападам у сераду на двух салдат Нацыянальнай гвардыі ў Вашынгтоне, акруга Калумбія, які быў здзейснены 29-гадовым Рахманула Лаканвалам, былым афганскім салдатам, які супрацоўнічаў з амерыканскімі вайскоўцамі і ЦРУ падчас вайны ў Афганістане. Узброены чалавек забіў 20-гадовую Сару Бэкстрам. 24-гадовы Эндру Вулф атрымаў сурʼёзныя раненні і застаецца ў бальніцы.
Паводле Washington Post, Лаканвал праходзіў праверку ў Нацыянальным цэнтры па барацьбе з тэрарызмам і атрымаў станоўчае рашэнне па сваёй заяве аб прадастаўленні прытулку ў 2024 годзе. Ён прыбыў у Злучаныя Штаты пасля эвакуацыі амерыканскіх войскаў з Афганістана ў 2021 годзе ў рамках праграмы перасялення былых саюзнікаў ЗША.
У чацвер вечарам прэзідэнт ЗША Дональд Трамп абвясціў пра шэраг радыкальных змен у іміграцыйнай палітыцы ЗША, у тым ліку пра поўнае прыпыненне міграцыі з «краін трэцяга свету», адмену льгот для замежнікаў і адмену грамадзянства для натуралізаваных грамадзян ЗША, якія «падрываюць унутраны мір».
У дзень нападу ў Вашынгтоне Служба грамадзянства і іміграцыі ЗША (USCIS) абвясціла пра прыпыненне апрацоўкі заявак, пададзеных грамадзянамі Афганістана, а ў чацвер было абвешчана аб пераглядзе рашэння аб выдачы Green Card грамадзянам 19 краін з Афрыкі, Паўднёвай Амерыкі і Азіі.
Яшчэ ў чэрвені прэзідэнт Трамп выдаў загад аб прыпыненні або абмежаванні выдачы віз грамадзянам Афганістана, Мʼянмы, Чада, Рэспублікі Конга, Экватарыяльнай Гвінеі, Эрытрэі, Гаіці, Ірана, Лівіі, Самалі, Судана і Емена. Выдача віз таксама была часткова скарочана для жыхароў Бурундзі, Кубы, Лаоса, Сьера-Леонэ, Тога, Туркменістана і Венесуэлы.
РАР/вх