Учора раніцай (19 верасня) тры расійскія знішчальнікі МіГ-31 уварваліся ў паветраную прастору Эстоніі над Фінскім залівам і знаходзіліся там агулам 12 хвілін.
У расійскіх самалётаў не было планаў палёту, іх транспондеры былі выключаны, а пілоты не падтрымлівалі сувязь з дыспетчарскімі службамі.
На інцыдэнт спачатку адрэагавалі фінскія знішчальнікі, а затым італьянскія Ф-35, размешчаныя на эстонскай авіябазе Амары ў рамках місіі НАТА Baltic Air Policing па патруляванні паветранай прасторы Балтыкі.
«Сістэма супрацьпаветранай абароны НАТА спрацавала. Самалёты прымусілі расійскія самалёты пакінуць наша неба. Вядома, такое працяглае знаходжанне ў паветранай прасторы Эстоніі з'яўляецца, як мінімум, актам злой волі, калі не спланаванай аперацыяй», – заявіў прэмʼер Эстоніі Крыстэн Міхал.
Ён таксама абвясціў, што Талін вырашыў актываваць артыкул 4-ы НАТА, бо, як ён падкрэсліў, неабходныя кансультацыі з хаўруснікамі для сумесных дзеянняў і вызначэння далейшых крокаў.
Прэзідэнт Эстоніі Алар Карыс таксама пракаментаваў гэтае пытанне. У сацыяльных сетках ён назваў уварванне трох расійскіх знішчальнікаў «чарговай правакацыяй». На яго думку, такія інцыдэнты дэманструюць, што супрацьпаветраная абарона павінна стаць прыярытэтам для альянсу.
Міністэрства замежных спраў Эстоніі выклікала часовага паверанага ў справах Расіі ў Таліне і ўручыла яму дыпламатычную ноту.
Парушэнне паветранай прасторы Эстоніі асудзілі сусветныя лідары.
«Ну, мне гэта не падабаецца. Гэта можа стаць вялікай праблемай», – скаментараваў парушэнне паветранай прасторы Эстоніі расійскімі знішчальнікамі прэзідэнт ЗША Дональд Трамп:
-Мне трэба разабрацца ў гэтым пытанні. У мяне хутка будзе брыфінг па гэтым пытанні, таму я паведамлю вам сёння ўвечары ці заўтра. Ну, мне гэта не падабаецца. Мне не падабаецца, калі такое адбываецца. Гэта можа быць вялікай праблемай, але я паведамлю вам пазней.
У сваю чаргу, Міністэрства абароны Расіі адмаўляе, што расійскія знішчальнікі парушылі паветраную прастору Эстоніі.
IAR/аз