Украіна можа ізаляваць анексаваны Крым ужо «ў найбліжэйшай будучыні». Пра гэта ў інтэрв'ю Reuters заявіў камандуючы Сіламі беспілотных сістэм Украіны Роберт Броўдзі з пазыўным «Мадзяр».
Паводле яго, рэгулярныя ўдары ўкраінскіх дронаў па трасе «Наваросія», якая злучае акупаваныя тэрыторыі з Крымам, ужо істотна ўскладнілі расійскую лагістыку. Расійскія войскі былі вымушаныя больш чым на дзве траціны скараціць аб'ёмы перавозак па гэтым маршруце.
— Яшчэ праз месяц Украіна атрымае поўны кантроль над гэтай дарогай, — заявіў Броўдзі, падкрэсліўшы, што Кіеў імкнецца стварыць умовы, пры якіх расійскім акупантам і супрацоўнікам ваенпраму будзе «надзвычай складана» знаходзіцца ў Крыме і карыстацца шляхамі, што вядуць на паўвостраў.
Пры гэтым камандзір запэўніў, што Украіна не наносіць і не плануе наносіць наўмысныя ўдары па цывільным насельніцтве і грамадзянскіх аб'ектах.
pap/эж