З пачатку ліпеня Расія запусціла па Украіне больш балістычных ракет, чым вырабляе за месяц, падлічыў у сваёй апошняй справаздачы Амерыканскі інстытут вывучэння вайны (ISW). Аналітыкі падазраюць, што расійскія войскі выкарыстоўваюць ракетныя рэзервы.
Паводле ўкраінскага сайта militarnyi.com, у ліпені Расія выкарыстала да дзвюх трацін запланаванага гадавога аб'ёму вытворчасці ракет «Цыркон». Дадзеныя ўкраінскіх ВПС паказваюць, што з пачатку ліпеня Расія выкарыстала супраць Украіны 107 балістычных ракет і 20 ракет «Цыркон».
Між тым, паводле Галоўнага ўпраўлення разведкі (ГУР) Міністэрства абароны Украіны, Расія вырабляе прыблізна 60 балістычных ракет «Іскандэр-М» і 40 ракет для сістэмы С-400 штомесяц.
— Здаецца, што Расія выкарыстоўвае свае рэзервы, каб працягваць павялічваць колькасць балістычных ракет, запушчаных па Украіне, бо гэтыя ракеты больш эфектыўныя, чым беспілотнікі і крылатыя ракеты, — ацанілі аналітыкі ISW.
Паводле экспертаў, Расія скараціла колькасць беспілотнікаў, якія выкарыстоўваюцца ў начных атаках. З пачатку ліпеня расіяне выкарысталі 2 955 беспілотнікаў. У чэрвені іх было 5 749.
Паветраныя сілы Украіны паведамілі, што ў ноч з суботы на нядзелю расійскія войскі правялі масіраваны скаардынаваны напад на Украіну з выкарыстаннем 41 ракеты і 125 беспілотнікаў. Іхнай галоўнай мэтай быў Кіеў.
Украіне тэрмінова патрэбныя ракеты «Patriot», бо яны зʼяўляюцца адным з нямногіх сродкаў, здольных перахопліваць расійскія балістычныя ракеты, якія Расія ўсё часцей выкарыстоўвае для атак па ўкраінскіх гарадах.
Прэзідэнт ЗША Дональд Трамп падчас размовы з прэзідэнтам Украіны Уладзімірам Зяленскім падчас саміту НАТА ў Анкары абвясціў, што ўкраінцы атрымаюць ліцэнзію на вытворчасць ракет «Patriot» ва Украіне.
аз/PAP