Паўночная Карэя працягвае ўзмацняць вайсковую падтрымку Расіі і перадала новую партыю балістычных ракет для выкарыстання ў вайне супраць Украіны. Пра гэта паведамляе сайт Defence24 са спасылкай на ўкраінскую ваенную разведку і агенцтва Reuters.
Паводле прадстаўніка Галоўнага ўпраўлення разведкі Украіны Андрэя Чарняка, у Варонежскай вобласці Расіі пачынае разгортвацца паўночнакарэйскае ракетнае падраздзяленне. Пхеньян ужо адправіў 40 балістычных ракет KN-23 і KN-24 разам з вайскоўцамі. Паводле ацэнак украінскай разведкі, у будучыні падраздзяленне можа атрымаць да 120 ракет і шэсць пускавых установак. Таксама ў складзе 112-й ракетнай брыгады Расіі могуць размясціць каля 90 паўночнакарэйскіх вайскоўцаў.
Reuters адзначае, што незалежна пацвердзіць гэтыя звесткі не ўдалося, а Міністэрства абароны Расіі і прадстаўніцтва КНДР пры ААН не пракаментавалі інфармацыю.
Паводле Defence24, разгортванне адбываецца пасля таго, як Расія ўпершыню з жніўня мінулага года зноў выкарыстала паўночнакарэйскія балістычныя ракеты для ўдараў па Украіне. Ваеннае супрацоўніцтва паміж Масквой і Пхеньянам значна ўзмацнілася пасля расійскага ўварвання ва Украіну.
Паводле ўкраінскіх уладаў, КНДР ужо паставіла Расіі мільёны артылерыйскіх снарадаў і накіравала каля 14 тысяч вайскоўцаў, частка якіх знаходзіцца ў Курскай вобласці.
эж