У нядзелю, 24 жніўня, у Расіі паведамляюць пра серыю атак беспілотнікаў на стратэгічныя аб’екты. У Ленінградскай вобласці дроны ўдарылі па порце Усць‑Луга — найбуйнейшым марскім порце краіны на Балтыцы. Пажар, які працягваўся каля пяці гадзін на тэрмінале НАВАТЭК, ліквідавалі, пацярпелых няма.
У Самарскай вобласці ўкраінскія беспілотнікі атакавалі Сызранскі НПЗ. Паводле мясцовых тэлеграм-каналаў, было чутно каля 20 выбухаў, а мясцовы губернатар адзначыў, што мэтай удара стала прамысловая інфраструктура.
Акрамя таго, дрон трапіў на аб’ект Курскай АЭС, дзе таксама ўзнік пажар. Пакуль МАГАТЭ гэту інфармацыю не пацвердзіла.
Усяго з вечара 23 жніўня, паводле расійскіх уладаў, над тэрыторыяй Расіі збілі больш за 150 беспілотнікаў у больш чым дзесяці рэгіёнах.
Некалькі аэрапортаў прыпынялі працу: у пецярбургскім Пулкава затрымалі больш за 60 рэйсаў, і аэрапорт амаль суткі працаваў з абмежаваннямі.
эж