Наступствы рашэння ўладаў у Кіеве дазволіць маладым мужчынам ва ўзросце 18-22 гадоў выязджаць за мяжу ўжо бачныя на польска-ўкраінскай мяжы, адзначае партал wnp.pl.
З 26 жніўня маладыя ўкраінцы могуць выязджаць за мяжу, нягледзячы на ваеннае становішча ў краіне. Гэта тычыцца мужчын ва ўзросце 18-22 гадоў.
Украінскія ўлады аслабілі абмежавальныя правілы мабілізацыі, «каб забяспечыць маладым украінцам вучобу і працу за мяжой».
Вынікі не прымусілі сябе доўга чакаць. Паводле апошніх дадзеных з мяжы, рашэнне ўкраінскіх уладаў мела ўражлівы эфект.
Якія былі матывы ўкраінскіх уладаў, каб дазволіць маладым людзям выязджаць?
Паводле слоў Кшыштафа Нячыпара (Krzysztof Nieczypor), галоўнага спецыяліста групы па Беларусі, Украіне і Малдове Цэнтра ўсходніх даследаванняў, вырашальным фактарам былі палітычныя разлікі, а не экзістэнцыяльныя і ваенныя меркаванні.
Ён падкрэсліў, што ў першую чаргу ўлады ў Кіеве, у тым ліку сам прэзідэнт Уладзімір Зяленскі, чакаюць, што ўдасца дасягнуць спынення агню і адразу пасля гэтага правесці выбары.
Ён дадае, што Зяленскі ўважліва ставіцца да маладых, пра што сведчаць яго паводзіны падчас пратэстаў супраць закона, які рэгулюе дзейнасць антыкарупцыйных органаў у краіне.
«У выніку моладзевых пратэстаў Зяленскі саступіў і паабяцаў прыняць новы закон, які гарантуе незалежнасць антыкарупцыйных органаў», сказаў Кшыштаф Нечыпар.
яс