У ноч на нядзелю, 15 лістапада, беспілотнікі атакавалі ПАТ "Ніжнекамскнафтахім" у горадзе Ніжнекамску ў расійскім Татарстане. Пасля ўдару на прадпрыемстве ўспыхнуў маштабны пажар, паведамілі OSINT-аналітыкі ASTRA, спасылаючыся на відэа відавочцаў. Кадры пажару на заводзе таксама апублікаваў Telegram-канал Exilenova+.
Як паведамляе УНІАН, у 02:55 па кіеўскім часе ўлады Татарстана папярэдзілі аб пагрозе нападу беспілотнікаў для васьмі гарадоў рэспублікі.
"Ніжнекамскнафтахім" уваходзіць у холдынг "СІБУР", найбуйнейшую нафтахімічную кампанію Расіі. Гэта адно з самых буйных прадпрыемстваў галіны не толькі ў РФ, але і ва Усходняй Еўропе.
Завод выпускае ізапрэнавы, бутылавы, галабутылавы і бутадыенавы каўчукі. Акрамя таго, там вырабляюць этылен, прапілен, бензол, сінтэтычныя змазачныя матэрыялы і прапіленгліколь.
На відэа, якія распаўсюджваюць відавочцы, бачна, што агонь ахапіў значную плошчу. Пры гэтым кіраўнік Ніжнекамска Радмір Бяляеў не ўдакладніў, куды менавіта маглі трапіць дроны. Ён толькі заклікаў жыхароў заставацца ў сховішчах.
Завод атрымлівае сыравіну ад двух суседніх нафтаперапрацоўчых комплексаў, "ТАІФ-НК" і "ТАНЕКА" (яго ўладальнік — нафтавая кампанія "Татнафта"). З яе там вырабляюць каўчукі, пластмасы і этылен. Прамысловую зону Ніжнекамска, дзе размешчаны ўсе тры прадпрыемствы, украінскія дроны атакавалі ўжо не раз.
нг