Улады ў Маскве плануюць далейшыя наступальныя аперацыі і разгортванне большай колькасці войскаў, у прыватнасці, шляхам пашырэння працэсаў мабілізацыі, заявіў прэзідэнт Украіны Уладзімір Зяленскі.
Зяленскі напісаў у Тэлеграме, што ў Кіева ёсць дакументы з расійскага Генеральнага штаба, якія сведчаць аб тым, што самі расіяне прызнаюць сваю няздольнасць выконваць задачы палітычнага кіраўніцтва.
Пасля сустрэчы з начальнікам Галоўнага ўпраўлення разведкі (ГУР) Алегам Івашчанкам палітык адзначыў, што ўкраінскія сілы знішчаюць наступальны патэнцыял расійскай арміі, а працэнт незваротных страт расійскай арміі ўжо складае прыблізна 60% ад агульных страт.
— Нягледзячы на гэта, расійскія ўлады плануюць далейшыя наступальныя аперацыі і рыхтуюцца да прыцягнення большай колькасці войскаў, у прыватнасці, шляхам пашырэння мабілізацыйных працэсаў у Расіі, — напісаў Зяленскі.
Ён падкрэсліў, што ў гэтым плане задача Украіны — далейшае павелічэнне працэнта незваротных страт расійскай арміі, павелічэнне выкарыстання беспілотнікаў на фронце і пашырэнне «доўгатэрміновых санкцый супраць расійскай вытворчасці зброі і нафтавай прамысловасці».
— Мы таксама будзем інфармаваць нашых партнёраў аб далейшай распрацоўцы ў Маскве планаў аперацый супраць краін НАТА, а таксама аб спробах больш актыўна ўцягнуць Беларусь у выкананне расійскіх задач, — сказаў украінскі лідар.
ав