У Каралеўскім замку ў Варшаве можна палюбавацца карцінай «Мадонна з дзіцём», якая вярнулася ў Польшчу пасля 70 гадоў. Твор, які прапаў падчас Другой сусветнай вайны, быў знойдзены на аўкцыёне ў Токіа ў студзені 2022 года і афіцыйна перададзены ў калекцыю Музея князёў Любамірскіх.
Каштоўную карціну ў стылі барока можна ўбачыць у рамках экскурсіі па Каралеўскіх апартаментах толькі да канца ліпеня, кажа дырэктар Каралеўскага замку Войцех Фалкоўскі(Wojciech Fałkowski):
- Мы паказваем яе ў прывітальным пакоі, дзякуючы таму ўсе наведвальнікі змогуць пабачыць гэтую прыгожую карціну «Мадонна з дзіцём», якая вярнулася ў Польшчу і пашырыла польскія фонды. Вобраз – спасылаецца на Мадонну Тыцыяна, але гэта творчая копія, выдатны твор мастацтва.
Са жніўня твор будзе выстаўлены ў музеі ў Пшэворску (Przeworsk). «Мадонна з дзіцём» – першы ў гісторыі, страчаны падчас вайны польскі твор мастацтва, які быў знойдзены ў Азіі.
Да вайны ён знаходзіўся ў палацы Любамірскіх у Пшэворску, які апынуўся пад нямецкай акупацыяй. Карціна была захопленая немцамі ў 1940 годзе і пазней вывезеная ў Германію. З гэтага часу месца ейнага знаходжання нельга было вызначыць. У канцы 1990-х гадоў праца была прададзеная на аўкцыёне ў Нью-Ёрку.
Карціна «Мадонна з дзіцём» датуецца канцом XVI або пачаткам XVII стагоддзяў.
IAR/аз