Пайшоў з жыцця Эдвард Зайкоўскі: чакае выдання яго праца пра балцкія старажытнасці Беларусі

Эдвард Зайкоўскі пісаў манаграфію пра культуру продкаў беларусаў, у тым ліку на матэрыялах з Польшчы.

Эдвард Зайкоўскі на Замкавай гары ў Вільні.

Facebook.com/Эдвард Зайкоўскі

23 ліпеня ў Мінску развіталіся з Эдвардам Зайкоўскім, вядомым беларускім археолагам. У апошнія гады пра яго было мала чуваць.

Беларускі археолаг Эдвард Зайкоўскі памёр у Мінску ва ўзросце 72 гадоў. Ён нарадзіўся 18 лістапада 1952 года ў вёсцы Дубашы Валожынскага раёна. А пахавалі вучонага 23 ліпеня 2025 года паблізу ад месца нараджэння — у вёсцы Вялікія Крывічы Валожынскага раёна.

27 ліпеня 2025 года аб 11.30 у касцёле святога Аляксандра ў Варшаве (plac Trzech Krzyży) адбудзецца імша за супакой душы Эдварда Зайкоўскага.

У 1975 годзе Зайкоўскі скончыў Беларускі дзяржаўны ўніверсітэт. З 1980 года працаваў у Інстытуце гісторыі Акадэміі навук БССР (цяпер Нацыянальная акадэмія навук Беларусі). У 1985 годзе абараніў кандыдацкую дысертацыю. Спецыялізаваўся на вывучэнні помнікаў неаліту і бронзавага веку, даследаваў старажытныя язычніцкія вераванні і першабытнае мастацтва на тэрыторыі Беларусі, у тым ліку спадчыну балтаў.

Удзельнічаў Эдвард Зайкоўскі і ў беларускім нацыянальным руху 1980-1990-х гг. 23 ліпеня Зянон Пазняк напісаў у сваім тэлеграм-канале, што Зайкоўскі быў «прыхільнікам» Кансерватыўна-хрысціянскай партыі Беларускага народнага фронту.

Археолагі ў Інстытуце гісторыі НАН Беларусі: у першым радзе Вераніка Лебедзь, у другім радзе Эдвард Зайкоўскі і Вадзім Шадыра. Мінск, 2021 г.

Пра навуковую, а таксама грамадскую дзейнасць вучонага ўспамінае археолаг Вераніка Лебедзь: яны разам працавалі ў Інстытуце гісторыі Нацыянальнай акадэміі навук Беларусі. У 2012 годзе Эдварда Зайкоўскага адправілі на пенсію, па дасягненні 60-гадовага ўзросту. А Вераніка Лебедзь цяпер жыве і працуе ў Польшчы, але да апошніх дзён жыцця падтрымлівала сувязь з калегам. Яна расказала, што Зайкоўскі пісаў манаграфію пра культуру продкаў беларусаў, у тым ліку на матэрыялах з Польшчы, Літвы.

Віктар Корбут

Слухайце аўдыё