Шмат гадоў на Беласточчыне, дзе кампактна пражывае беларуская нацыянальная меншасць, праходзяць народныя фэсты і іншыя культурныя мерапрыемствы. Іх праводзяць як арганізацыі кшталту найстарэйшага ў Польшчы Беларускага грамадска-культурнага таварыства, так і паасобныя гміны.
17 гадоў таму да арганізацыі падобных культурных форумаў далучыўся Гайнаўскі музей і цэнтр беларускай культуры. У іх аднак ідэя была іншая: наладзіць мерапрыемствы ў такіх вёсках, дзе засталося мала жыхароў. Назвалі гэты цыкл «І там жывуць людзі».
Але калі прыедзем у гэтую вёску, то ў фэста ўжо іншая назва – «І тут жывуць людзі», гаворыць дырэктар гайнаўскай установы Тамаш Ціханюк.
«Калі 17 гадоў таму мы пачалі рэалізацыю гэтага праекта, то гэта была свайго роду проба, каб зразумець, ці народ будзе прыходзіць на канцэрты і ці ўвогуле будзе водгук на іх. Правялі два мерапрыемствы і аказалася, што яны карыстаюцца папулярнасцю», – гаворыць Тамаш Ціханюк.
Пазней у Міністэрства ўнутраных спраў і адміністрацыі была пададзеная заяўка на фінансаванне, арганізатары атрымалі першы грант. Дырэктар кажа, што ніхто і не думаў, што фэст працягнецца столькі часу.
«Мінула 17 гадоў, 100-ы фэст адбудзецца 31 жніўня ў вёсцы Катоўка. Агулам мы наведалі з канцэртамі амаль 100 вёсак. Здаралася, што людзі прасілі зноўку да іх прыязджаць праз 10 ці 15 гадоў пасля таго, як мы іх наведалі. Гэта сведчыць пра тое, што ёсць патрэба ў народзе, што нягледзячы на гэтыя 17 гадоў, надалей ёсць запатрабаванне на такія ініцыятывы», – гаворыць дырэктар.
У нядзелю, 31 жніўня, 100-ы фэст з цыклу «І там жывуць людзі» пройдзе ў вёсцы Катоўка на Гайнаўшчыне.
З Тамашом Ціханюком размаўляў Яраслаў Іванюк
поўная размова – слухайце аўдыёфайл