Пачаўся набор заявак на Агульнапольскі конкурс беларускай паэзіі і прозы «Дэбют». Яго мэта – захаваць і развіваць беларускія літаратурныя традыцыі, падтрымліваць маладых і таленавітых аўтараў у Польшчы. Конкурс ахоплівае дзве ўзроставыя групы: дзеці і моладзь з базавых школ і ліцэяў ды дарослыя аўтары, якія пішуць на беларускай мове.
«Дэбют» – гэта штогадовы літаратурны конкурс, які арганізуюць тыднёвік беларусаў Польшчы «Ніва» сумесна з Беларускім саюзам у Польшчы. Сёлета ён пройдзе ў 29-ы раз. Падрабязнасці распавяла журналістка «Нівы», пісьменніца і паэтэса Міра Лукша.
– Конкурс праводзіцца ў двух катэгорыях: дзеці і моладзь базавых школаў ды ліцэяў плюс дарослыя. На працягу гэтых гадоў у конкурсе прыняло ўдзел недзе тысяча чалавек, некаторых ужо няма ў жывых. Ёсць такія аўтары, якія пішуць амаль ад пачатку і надалей далучаюцца да конкурсу, каб падтрымаць традыцыю. Часам здараецца і ўдзел прадстаўнікоў розных пакаленняў: піша бабуля, дачка, унучка ці ўнучак. Галоўнае – не ўзнагарода, галоўнае – удзел, а пасля – публікацыя твораў у «Ніве» ці дзіцячым дадатку «Зорка», а таксама ў літаратурных часопісах. Наш конкурс прэстыжны і вельмі важны, таму заахвочваем усіх да удзелу, – сказала Міра Лукша.
На конкурс прымаюцца творы, якія раней не публікаваліся і не атрымлівалі прэмій у іншых конкурсах. Вершы і прозу можна дасылаць у «Ніву» да 15 лістапада.
Анна Пятроўская
слухайце аўдыёфайл