Павелічэнне выдаткаў на лагістыку азначае, што неўзабаве інтэрнэт-крамы могуць перастаць быць такімі прывабнымі для карыстальнікаў, як гэта было да гэтай пары. E-commerce шукае ашчаднасці, паведамляе «Rzeczpospolita».
Газета адзначае, што палітыка бясплатнага вяртання пасылак была адным з рухавікоў дынамічнага росту рынку электроннага гандлю. Пандэмія дадаткова папулярызавала інтэрнэт-шопінг і магчымасць, дзякуючы якой кліенты, карыстаючыся бясплатнай дастаўкай – замаўлялі некалькі памераў сукенак ці туфляў, каб дома выбраць сярод іх адпаведную мадэль, а астатнія адправіць назад.
Фінансавы цяжар усёй лагістычнай аперацыі на многіх платформах электроннай камерцыі ўзялі на сябе прадаўцы. Аднак з пачатку года з-за шалёнай інфляцыі і росту коштаў на паліва выдаткі на кур'ерскія паслугі, уключаючы вяртанне пасылак, сталі моцна абцяжарваць інтэрнэтны гандаль.
На думку экспертаў, якіх цытуе «Rzeczpospolita», высокія выдаткі на абслугоўванне, адпраўленых назад пакупак, інтэрнэт-прадаўцы плануюць кампенсаваць шляхам павышэння цэнаў прадуктаў, або змены палітыкі дастаўкі тавараў.
Адмова ад бясплатнай дастаўкі – толькі адзін са спосабаў. Правілы дазваляюць інтэрнэт-крамам выплачваць кліенту грошы за вернутую пасылку, але неабавязкова ў памеры фактычнага кошту курʼерскай паслугі.
Паводле закона, інтэрнэт-прадавец можа кампенсаваць кошт дастаўкі ў памеры самага таннага варыянту. Напрыклад, калі мы пералічым краме грошы за вяртанне пасылкі курʼерам, крама верне нам эквівалент найбольш таннага варыянту дастаўкі, напрыклад, кошт адпраўкі пры дапамозе аўтаматызаванай паштовай станцыі.
aз