Больш за 18% (18,4%) палякаў інвеставалі ў крыптавалюты. Пра гэта сведчыць справаздача UCE Research і Ari10.
Паводле яе, крыптавалюты часцей за ўсё купляюць людзі ва ўзросце ад 25 да 34 гадоў (28,4%), жыхары найбуйнейшых гарадоў (20,8%), якія працуюць на поўным штаце і зарабляюць ад 7 да 9 тысяч злотых без уліку падаткаў і збораў у месяц (1 639 – 2 108 еўра)(31,2%).
Паводле слоў Матэвуша Кары з анлайн-біржы крыптавалют Ari10, 18,4% палякаў, якія інвеставалі ў крыптаактывы – гэта высокі паказчык.
«Гэтыя віды актываў усё яшчэ лічацца новымі ў параўнанні з рынкамі золата або акцыяў. Перашкодай для многіх людзей, асабліва старэйшых, з'яўляецца чорны піяр, накіраваны на крыптавалюты. Некаторыя асацыююць лічбавыя валюты са злачыннасцю і баяцца крадзяжу», — адзначыў эксперт.
Паводле адмыслоўцаў, перад галіной яшчэ шмат выклікаў, каб заваяваць давер большай часткі палякаў. Тут неабходная сумленная інфармацыя, як пра патэнцыйныя выгады, так і пра рызыкі, звязаныя з такімі інвестыцыямі.
Усё ж аўтары дакладу прагназуюць, што зацікаўленне крыптавалютамі будзе расці. Неабходны толькі час дзеля ўкаранення новага віду актываў на рынку.
«Палякі інвестуюць у крыптавалюты па многіх прычынах, і гэта не заўсёды чыстае жаданне зарабіць грошы. Гаворка ідзе таксама пра падтрыманне пакупніцкай здольнасці. Ва ўмовах высокай інфляцыі спажыўцы зацікаўлены ў інвеставанні ў крыптавалюты, бо яны заўважаюць пастаяннае зніжэнне кошту традыцыйных валютаў», - пераконваюць эксперты.
PAP/аз