У Польшчы распрацоўваецца новая сістэма фінансавання чыгункі

Новая сістэма павінна зрабіць Польшчу незалежнай ад сродкаў з ЕС, кажуць эксперты.

Чыгунка

крыніца: Pixabay.com/652234

Урад пачаў працу над новай мадэллю фінансавання чыгункі. Праект падрыхтавала Міністэрства інфраструктуры, але займацца ім будзе таксама Міністэрства фінансаў. Новая мадэль прызначана для забеспячэння пастаяннага і стабільнага фінансавання чыгуначных інвестыцый.

Старшыня Групы эканамічных дарадчыкаў TOR Адрыян Фургальскі(Adrian Furgalski) заявіў, што на дадзены момант тэмпы інвестыцый у чыгунцы дыктуюцца фондамі ЕС. Мэта праекта – памяняць гэта:

- Новая сістэма павінна зрабіць Польшчу незалежнай ад сродкаў з ЕС. Нагадваю, цягам часу еўразвязаўскіх сродкаў у Польшчу будзе паступаць менш, між тым, інвестыцый да рэалізацыі менш не будзе.

Новыя правілы прадугледжваюць стварэнне Чыгуначнага фонду па ўзоры Нацыянальнага дарожнага фонду, які будзе выкарыстаны для фінансавання інвестыцый у чыгунку.

Фонд павінен гарантаваць доступ да сродкаў на ўзроўні 10 мільярдаў злотых у год.

Паводле экспертаў, гэта павінна дазволіць планаваць чыгуначныя інвестыцыі, звязаныя з Цэнтральным камунікацыйным хабам. Новы закон аб фінансаванні чыгуначных інвестыцый павінен быць гатовы да канца гэтага года.

IAR/аз