Прафсаюз чыгуначнікаў праводзіць пратэсты ў 17 месцах па ўсёй Польшчы. Паводле слоў членаў прафсаюза, урад грэбуe чыгуначным транспартам, аддаючы перавагу аўтамабільным грузаперавозкам.
Пратэсты пачаліся 28 ліпеня і працягнуцца да 1 жніўня. Блокпасты арганізуюцца штодня з 10:00 да 14:00. Кіроўцы павінны ўлічыць значныя перашкоды.
Прафсаюзныя актывісты патрабуюць ад Міністэрства інфраструктуры павялічыць выдаткі на чыгунку і скараціць кошты для чыгуначных перавозчыкаў.
Марцін Похуд (Marcin Pochód) з прафсаюза машыністаў кажа, што доступ да чыгуначнай інфраструктуры ў Польшчы вельмі дорага каштуе.
— Патрэбна знізіць аплаты. У нас самыя высокія кошты ў Еўропе на доступ да чыгуначнай інфраструктуры. У Польшчы самыя высокія аплаты за электрычнасць цягавых ліній ва ўсім Еўрапейскім Саюзе.
Старшыня прафсаюза машыністаў Лешак Ментэк (Leszek Miętek) расказаў, што ў Польшчы грузавікі выкарыстоўваюцца для перавозкі цяжкіх будаўнічых матэрыялаў, бетону і сталі на сотні кіламетраў для дарожнага будаўніцтва.
«Шмат гаворыцца пра экалогію, закрываюцца шахты і вугальныя электрастанцыі, але, нікога не хвалюе, што 100 грузавікоў выкарыстоўваюцца для перавозкі цяжкіх запаўняльнікаў на вялікія адлегласці, якія можна перавезці адным цягніком», — падкрэсліў Ментэк.
Пратэст чыгуначнікаў падтрымлівае Усепольскі альянс прафсаюзаў. Яго старшыня Пётр Астроўскі (Piotr Ostrowski) адзначыў, што ў грузавых перавозках пануе нядобрасумленная канкурэнцыя.
— Рашучая большасць грузаперавозак у Польшчы гэта аўтамабільныя перавозкі. Чыгунка амаль зусім не выкарыстоўваецца. І гэта прывяло да сітуацыі, з якой мы цяпер змагаемся ў чыгуначнай грузатранспартнай кампаніі PKP Cargo.
У PKP Cargo ідуць масавыя звальненні. У ліпені мінулага года было звольнена 3665 супрацоўнікаў. У цяперашні час у кампаніі працуе каля 10 000 чалавек. У чэрвені PKP Cargo зноў абвясціла пра намер правесці масавыя звальненні да 1041 супрацоўніка ў 2025 годзе і да 1388 у 2026 годзе.
IAR/яс