Да праекту далучаюцца чарговыя ваяводствы. Нядаўна далучылася Падкарпацкае ваяводства, рэгіён на паўночным усходзе краіны. З 1 студзеня спальванне ў старых печах у так званых «дымніках» у Падкарпацці будзе карацца штрафам да 5 тысяч злотых (1150 еўра).
Па ўсёй Польшчы праводзяцца праверкі катлоў. Чыноўнікі правяраюць выкананне правілаў аб барацьбе са смогам. На практыцы гэта азначае, што супрацоўнікі муніцыпальнай паліцыі ў гарадах правяраюць катэгорыю катла. А ў меншых гарадах і вёсках, дзе няма муніцыпальнай паліцыі, праверкі праводзяцца чыноўнікамі. Напрыклад, у гміне Рыгліцэ ў Малапольскім ваяводстве, праверкі спалучаюцца з экалагічнай адукацыяй, кажа бургамістр Павел Аўгустын.
— Праверкі праводзяць супрацоўнікі, упаўнаважаныя бургамістрам, але мы спалучылі гэтыя праверкі з асветніцкай працай. Мы звяртаем увагу на тое, што спальваецца, і тлумачым жыхарам, што нельга спальваць любыя дровы, што яны павінны быць сухімі. Мы штогод правяраем каля 150 печаў, з кожнай бяром каля 20 проб попелу, і кожны год адна-дзве пробы ўтрымліваюць забруджвальныя рэчывы. У такім выпадку справа перадаецца ў паліцыю, і паліцыя выпісвае штраф.
У Варшаве муніцыпальная паліцыя выкарыстоўвае спецыяльны сертыфікаваны беспілотнік, які падлятае да коміна і збірае пробу дыму спецыяльнай трубкай. Калі ён выяўляе забароненыя рэчывы, муніцыпальная паліцыя і чыноўнікі могуць накласці штраф да 500 злотых (115 еўра) падчас кожнай праверкі. Гэтыя праверкі паўтараюцца, тлумачыць старшы інспектар варшаўскай муніцыпальнай паліцыі Славамір Смык.
— Калі выяўляюцца парушэнні адносна катла, або, што ў печы спальваюцца адходы, супрацоўнікі прымаюць адпаведныя меры супраць асобы, якая парушыла закон. Выкарыстанне неадпаведнай ацяпляльнай прылады і спальванне адходаў — гэта два розныя правапарушэнні. У кожным выпадку муніцыпальная паліцыя можа накласці штраф да 500 злотых (115 еўра). Калі асоба адмаўляецца прыняць штраф, справа перадаецца ў суд. Суд можа накласці штраф да 5000 злотых (1150 еўра).
У Польшчы печы можна замяніць з дапамогай гранта з урадавай праграмы «Чыстае паветра». Больш чым 450 тысяч старых печаў ужо заменена.
ПР1/яс