Як паведамляе польскі партал energetyka24.com, улады Германіі пачалі падрыхтоўку на выпадак адключэння электрычнасці – так званага блэкауту. У першую чаргу тэсты арыентаваны на забеспячэнне грашовага абарачэння ў банкаўскай сферы і гандлі ў сітуацыі, калі сістэма электронных плацяжоў не будзе працаваць. Правяраюцца напрыклад экстраныя выплаты грашовых сродкаў.
Бундэсбанк удзельнічае ў выпрабавальных працэдурах, якія павінны гарантаваць дадатковы запас папяровых грошай. Таксама вядзецца падрыхтоўка да магчымага штурму банкаматаў і масавага зняцця наяўных з банкаўскіх рахункаў. Ідуць таксама дыскусіі аб магчымасці паставіць у прыярытэт грашовыя перавозкі – фуры, якія перавозяць наяўныя грошы, будуць мець спецыяльныя дазволы, напрыклад, на прыярытэтны доступ да паліва.
Акрамя Бундэсбанка, у працэсе выпрабаваннях і кансультацый на выпадак блэкаута павінны быць задзейнічаны такія арганізацыі, як Федэральны орган фінансавага нагляду і асацыяцыі фінансавага сектара.
Нямецкія ўлады супакойваюць, што верагоднасць адключэння электраэнергіі мінімальная. Федэральнае сеткавае агенцтва (BNetzA) сцвярджае, напрыклад, што энергасістэма Германіі з'яўляецца адной з самых стабільных у свеце, а яе аператары маюць у сваім распараджэнні шэраг механізмаў для перадухілення сурʼёзных збояў. Гэтыя словы павінны пацвердзіць вынікі стрэс-тэстаў, праведзеных аператарамі нямецкай энергасістэмы. Апошні з іх паказвае, што «крызісы ў энергасістэме зімой 2022/2023 гадоў вельмі малаверагодныя», аднак у наступным сказе дадаецца, што «іх нельга выключаць».
У цяперашняй геапалітычнай сітуацыі нельга выключаць дыверсій з боку Расіі, накіраваных на элементы энергетычнай сістэмы Еўропы. Расіяне і так маюць вельмі абмежаваныя магчымасці ўплыву на энергетычны сектар Еўропы – пастаўкі газу практычна спыненыя, і, нягледзячы на гэта, цэны на газ на біржах ЕС стабілізуюцца. 5 снежня ўступае ў сілу эмбарга ЕЗ на пастаўкі расійскай нафты. Так што Маскве не застаецца практычна нічога, акрамя дыверсій.
Снежань-студзень стануць вырашальным для нямецкай энергетыкі. Менавіта тады дзень самы кароткі, надворʼе часта пахмурнае (што зніжае магчымасці працы фотаэлектрыкі), а ў Германіі дамінуе перыяд без ветру (зніжэнне вытворчасці энергіі на ветраках).
Рызыка адключэння электраэнергіі ў Германіі павялічваецца з-за мадэлі нямецкай энергетычнай трансфармацыі, якая, сярод іншага, заключаецца ў адключэнні стабільных ядзерных магутнасцяў. Праблемы Нямеччыны вельмі лёгка могуць закрануць і Польшчу, падсумавалі на польскім партале energetyka24.com.
эж