Выданне Rzeczpospolita піша пра новага канцлера Германіі Олафа Шольц (Olaf Scholz). Ён стаў першым кіраўніком нямецкай дзяржавы, які ўзначаліў кааліцыю трох палітычных груповак. Самай важнай задачай новы канцлер лічыць барацьбу з пандэміяй. Гэтая тэматыка будзе абмяркоўвацца ў пятніцу ў Бундэстагу, пойдзе гаворка між іншым пра абавязковую вакцынацыю. У гэтым жа часе Шольц адправіцца ў першае замежнае падарожжа – у Парыж.
Гэта ўжо стала традыцыяй з часоў канцлера Гельмута Коля, што новаабраны кіраўнік Германіі першай наведвае сталіцу Францыю, а другой – сталіцу Польшчы. У пятніцу ў Варшаву завітае таксама новы міністр замежных спраў Германіі Аналена Бэрбок (Annalena Baerbock). Немцы імкнуцца да добрай супрацы з Польшчай, якую яны, незалежна ад палітычных зменаў, лічаць сваім важнейшым партнёрам, – прыводзіць выданне словы Каі-Олафа Ланга з нямецкага фонду Wissenschauf und Politik.
Падарожжа ў Варшаву – гэта таксама сігнал у напрамку Расіі ды іншых дзяржаваў, што Германія дэманструе адзінства Еўрапейскага Саюза і салідарнасць з Польшчаю, асабліва беручы пад увагу сітуацыю на польска-беларускай мяжы і канцэнтрацыю расійскіх войскаў на мяжы з Украінай.
Аднак геапалітычныя выклікі не будуць адзінай тэмай перамоваў падчас візіту высокапастаўленых нямецкіх гасцей у Польшчу. Пойдзе гаворка таксама пра вяршэнства закона ў краінах ЕС, будучыню супольнасці і ахову клімату. Гэтыя тэмы выклікаюць у Варшаве значнае занепакаенне. Тым не менш, візіты маюць вялізнае сімвалічнае значэнне, яны паказваюць імкненне Германіі да супрацы, нягледзячы на антынямецкую рыторыку дзейснага польскага ўраду.
Rzeczpospolita/нг