Кіроўная партыя ў Польшчы ідзе на трэці тэрмін. Туск – не альтэрнатыва

Сацыёлаг: Адзінай эфектыўнай альтэрнатывай было б, калі б замест Дональда Туска з'явіўся нейкі новы, малады лідар.

Збігнеў Зёбра - лідар «Салідарнай Польшчы» і міністр юстыцыі.

PAP/Rafał Guz

Кіроўная партыя ў Польшчы «Права і справядлівасць» ідзе на трэці тэрмін. Дональд Туск не зʼяўляецца альтэрнатывай, а апазіцыйнай «Грамадзянскай платформе» неабходны новы малады лідар, пераконвае ў размове з выданнем «Rzeczpospolita» прафесар Генрык Даманьскі з Інстытута філасофіі і сацыялогіі Польскай акадэміі навук.

Адказваючы на пытанне журналіста, ці існуе шанец на тое, што сацыяльна-эканамічная праграма «Польскі парадак» здолее яшчэ ўмацаваць кіроўную партыю, прафесар Даманьскі прызнаў, што гэта магчыма.
«Кіроўная партыя павінна разглядаць праграму, як яшчэ адзін доказ актыўнасці ўраду. На дадзены момант гэта мадэль, якая нагадвае мадэль скандынаўскай апякунчай дзяржавы, а згаданы фактар павінен умацаваць рэйтынгі ўрада, але толькі пасля вяртання да першапачатковай ролі праграмы», – кажа эксперт.

Сацыёлаг таксама лічыць, што не прывядуць да расколу ў лагеры ўлады апошнія спрэчкі паміж кааліцыянтамі, то бок «Салідарнай Польшчай» і «Правам і справядлівасцю», якія ўзніклі з-за спрэчкі паміж Польшчай і Еўрасаюзам, датычнай пытання вяршэнства закона ў Польшчы. «Палітыкі «Салідарнай Польшчы» падкрэсліваюць, што не пакінуць урад, што зʼяўляецца цалкам рацыянальнай стратэгіяй. Крытыка калегаў з «ПіС», з аднаго боку, нядрэнная, таму што сведчыць аб тым, што кіруючы лагер не зʼяўляецца маналітам. Збігнеў Зёбра (лідар «Салідарнай Польшчы» і міністр юстыцыі – рэд.) з’яўляецца праціўнікам членства Польшчы ў Еўрасаюзе, але гэта не перашкаджае яго партыі заставацца ва ўрадзе, бо выхад з яго не ў інтарэсах Зёбры ці любога іншага сябра «Салідарнай Польшчы». Яны самі нічога не значаць на польскай палітычнай сцэне», – нагадаў сацыёлаг.

Паводле прафесара Генрыка Даманьскага, таксама няма ніякіх прыкмет таго, што «Грамадзянская платформа» можа вярнуцца да ўлады. «Калі яна вернецца да ўлады, то як кааліцыйны партнёр так званага апазіцыйнага лагера, але ў сваю чаргу няма ніякіх прыкмет таго, што такая кааліцыя зʼявіцца па боку апазіцыі», – адзначыў прафесар.

Паводле яго, шмат сведчыць пра тое, што «Права і справядлівасць» ідзе на трэці тэрмін. «На дадзены момант альтэрнатывы «ПіС» няма. Адзінай эфектыўнай альтэрнатывай было б, калі б замест Дональда Туска зʼявіўся нейкі новы, малады лідар «Грамадзянскай платформы», – ацаніў прафесар Генрык Даманьскі ў інтэрвʼю выданню «Rzeczpospolita».

аз