«Цяпер геаграфія іншая. Гэта далёка не толькі ЛНР і ДНР, гэта яшчэ і Херсонская вобласць, Запарожкая вобласці і шэраг іншых тэрыторый, і гэты працэс працягваецца, прычым працягваецца паслядоўна і настойліва», – заявіў у сераду кіраўнік расійскай дыпламатыі Сяргей Лаўроў.
Пра намеры Масквы піша аўтар выдання Rzeczpospolita Руслан Шошын.
У справаздачы прэс-сакратара Рады нацыянальнай бяспекі ЗША Джона Кірбі са спасылкай на дадзеныя амерыканскай разведкі гаворыцца, што Крэмль ужо рыхтуе глебу для анексіі акупаваных тэрыторый, падобнай да той, што была праведзеная восем гадоў таму на Крымскім паўвостраве. Паводле амерыканскіх аналітыкаў, Расія рыхтуе акупаваныя тэрыторыі да рэферэндумаў, якія адбудуцца 11 верасня. Гэта будзе «адзіны дзень галасавання», падчас якога ў Расіі адбудуцца мясцовыя і парламенцкія выбары.
Пуцін хацеў бы акупаваць усю тэрыторыю Данецкай вобласці. Калі Расія ў 2014 годзе стварыла ў Данецку і Луганску самаабвешчаныя рэспублікі (Пуцін прызнаў іх незалежнасць перад самай вайной), то цяпер Крэмль стварае г.зв. ваенна-цывільныя адміністрацыі. Улады такой «адміністрацыі» на акупаванай частцы Запарожскай вобласці некалькі дзён таму заявілі аб правядзенні рэферэндуму аб «уваходзе ў склад Расіі» ў першай палове верасня. На чале акупаванага Запарожжа – прысланы з Расіі былы віцэ-губернатар Валагодскай вобласці Антон Кальцоў.
Пра падрыхтоўку да восеньскага рэферэндуму ў канцы чэрвеня загаварылі прызначаныя расіянамі ўлады Херсонскай вобласці. Там на чале г.зв ваенна-цывільнай адміністрацыі далучыліся калабаранты, якія раней былі прарасійскімі актывістамі ў рэгіёне. На акупаванай частцы Запарожжа і ў Херсонскай вобласці ўжо ўведзены расійскі рубель, закрытыя ўкраінскія тэлеканалы, а рэгіёны поўным ходам «перабудоўваюцца на расійскія стандарты».
Крэмль не адмаўляецца ад сваіх планаў заваяваць усю Украіну.
Расіяне таксама займаюць частку Харкаўскай вобласці, яны стварылі «адміністрацыі» ў некалькіх населеных пунктах. Некалькі дзён таму амерыканскі Цэнтр вывучэння вайны заявіў, што Пуцін па-ранейшаму не адмаўляецца ад планаў акупацыі ўсёй Харкаўскай вобласці. Аляксей Мухін, кіраўнік маскоўскага Цэнтру палітычнай інфармацыі, звязанага з расійскімі ўладамі, ідзе яшчэ далей і сцвярджае, што Крэмль не адмаўляецца ад сваіх планаў заваяваць усю Украіну.
– Размова ідзе пра стварэнне новай суверэннай украінскай дзяржавы, якая ў будучыні ўвойдзе ў саюз Расіі і Беларусі. Гэта маё асабістае меркаванне – кажа Мухін Rzeczpospolita.
Ён не прымае аргументаў, што расійская армія затрымалася на ўсходзе і поўдні краіны, не ўзяла ніводнага вялікага горада, акрамя Херсона, і не дасягнула сур'ёзных поспехаў за апошнія тыдні.
– У бліжэйшыя месяцы адбудзецца паскораная інтэграцыя вызваленых тэрыторый з сацыяльна-эканамічнай сістэмай Расіі – кажа маскоўскі аналітык і пацвярджае, што адпаведныя палітычныя рашэнні ў Крамлі могуць быць прынятыя восенню.
Ці скончыць Пуцін вайну, калі заваюе ўвесь Данбас?
– Гэта будзе залежаць ад паводзінаў Захаду, – кажа Мухін.
У Кіеве неаднаразова казалі, што замарожаная вайна і паўтарэнне падзей васьмігадовай даўніны, накшталт «мінскіх пагадненняў», не варыянт. Можна не сумнявацца, што Пуцін не спыніцца на акупаваных тэрыторыях і рана ці позна пойдзе далей.
– Для Украіны гэта непрымальна. Гэтага нельга рабіць, нават калі б наша ўлада хацела пайсці на такі сцэнар. Украінскае грамадства гэтага не прыме. Украінцы згодныя, што трэба вызваліць тэрыторыю ўсёй краіны. Расія не хоча ніякіх перамоваў і працягвае ставіць Украіне непрымальныя ўмовы. Калі б Масква хацела сапраўдных перамоваў, я думаю, што ў Кіеве таксама не адмовіліся б. Але выглядае, што Крэмль пачне размову толькі тады, калі ўкраінскае войска вызваліць Херсонскую вобласць – кажа Rzeczpospolita украінскі журналіст і парламентарый ад «Еўрапейскай салідарнасці» Мікола Княжыцкі. Ён не выключае, што ўвосень Расія сапраўды пачне анексію акупаваных тэрыторый. – Нічога ў іх не атрымаецца. Я лічу, што мы ўсё ж вызвалім нашы тэрыторыі. Але гэта азначае толькі адно – вайна будзе доўжыцца доўга. Мы думалі, што гэта хутка скончыцца, але, здаецца, гэта будзе доўжыцца яшчэ паўгода, год, а можа, і больш, – гаворыць Княжыцкі.
вх