Аб гэтым у газеце Rzeczpospolita піша Віктар Фэрфэцкі.
– Я буду падаваць зварот у Міністэрства замежных спраў і буду пытацца, якую адказнасць панясе кіраўніцтва польскага дыпламатычнага прадстаўніцтва – заявіў апазіцыйны дэпутат Робэрт Тышкевіч, член камітэту Сэйму па замежных справах.
Гэта рэакцыя на сустрэчу, якая ў панядзелак пайшла ў польскай амбасадзе ў Будапэшце. Лідар венгерскіх ультраправых Ляслё Тароцкай (Laszlo Toroczkai) сустрэўся з амбасадарам Себасцьянам Кенцекам (Sebastian Kęciek).
Ляслё Тароцкай месяц таму выклікаў скандал, павіншаваўшы Польшчу з Днём Незалежнасці. «Няхай Бог добраславіць Польшчу! Давайце зноў сустрэнемся на супольнай польска-венгерскай мяжы!» – напісаў ён у Twitter, праілюстраваўшы гэта чорна-белым фота з Ужоцкага перавала, дзе польскі і венгерскі памежнікі паціскаюць адзін аднаму рукі. Здымак зроблены пасля акупацыі Закарпацця Венгрыяй у 1939 годзе.
Сёння менавіта тут праходзіць польска-ўкраінская мяжа. Адрэагавала ўкраінскае МЗС.
– Польшча, з аднаго боку, спрабуе выступаць у ролі найвялікшага саюзніка Украіны, з другога – запрашае на сустрэчы чалавека, які з’яўляецца яе адкрытым ворагам. Гэта скандал, – кажа дэпутат Тышкевіч.
Спрэчкі вакол Тароцкая не абмяжоўваюцца Украінай. Ён таксама прытрымліваецца рэвізіянісцкіх поглядаў на межы Венгрыі з іншымі краінамі, і за апошнія гады некалькі разоў яму забаранялі ўезд у Славакію, Румынію і Сербію.
Што Тароцкай рабіў у польскай амбасадзе ў Будапэшце? Запіс, які ён апублікаваў у інтэрнэце, паказвае, што ён прыбыў туды ў кампаніі дэпутата ад сваёй партыі Давіда Доча, а сустрэча тычылася, між іншым, венгерска-польскай парламенцкай групы.
У Міністэрстве замежных справаў Польшчы пацвярджаюць, што сустрэча адбылася, але не толькі з Тароцкаем і Дочам, але і з паўтара дзясяткам парламентароў з венгерска-польскай групы. Аднак у МЗС не тлумачаць, чаму на сустрэчу прыехаў Тароцкай, які з'яўляецца не дэпутатам, а старастам адной з вёсак.
яс