Важнейшай падзеяй для Польшчы сёння з’яўляецца афіцыйны візіт прэзідэнта Украіны Уладзіміра Зяленскага разам з жонкаю Аленай Зяленскай. Як мы ўжо паведамлялі, яны прыехалі на запрашэнне прэзідэнта Польшчы Анджэя Дуды.
Сайт Niezalezna.pl прыводзіць словы прэзідэнцкага міністра Марціна Пшыдача (Marcin Przydacz) аб тым, што такія візіты зʼяўляюцца вялікім лагістычным і арганізацыйным выклікам, таксама з пункту гледжання бяспекі. Ён дадаў, што польска-ўкраінская сустрэча ўтрымлівае таксама формулу сустрэчы жонак прэзідэнтаў.
«Натуральна, што такія візіты – гэта вялікая праблема не толькі ў матэрыяльна-тэхнічным і арганізацыйным плане, але і ў плане бяспекі. Мы павінны пастаянна памятаць і мець на ўвазе, што Украіна з’яўляецца дзяржавай, на якую напаў агрэсар, яна знаходзіцца ў стане вайны, таму гэтыя меры бяспекі павінны быць на ўзроўні, вышэйшым за сярэдні», – адзначыў Пшыдач.
Міністр нагадаў, што гэты візіт ажыццяўляецца пры ўдзеле жонак прэзідэнтаў – Алены Зяленскай і Агаты Корнхаўзер-Дуды. «Першыя лэдзі суправаджаюць сваіх мужоў у першай частцы візіту, а ў другой частцы яны робяць асобную праграму, сустракаюцца з тымі людзьмі, якія ўдзельнічалі ў праекце, ініцыяваным сумесна жонкамі двух прэзідэнтаў, а гэта датычыць, у прыватнасці, падрыхтоўкі ўкраінскіх медыкаў, ратавальнікаў, лекараў і псіхолагаў», – сказаў на прэс-канферэнцыі Марцін Пшыдач.
нг