Расійскія генералы неаднаразова завышалі свае дасягненні. Эксперты не раз звярталі ўвагу на тое, што Украіна ніколі не мела столькі самалётаў ды танкаў, колькі міністэрства РФ знішчыла ў сваіх зводках. Гэта не самападман, а адмысловая палітыка для запалохвання ўкраінцаў ды Захаду перакананы эксперт.
Расійскае міністэрства абароны штодня паведамляе пра тое, што расійская армія палепшае становішча на фронце, «наносячы паражэнне жывой сіле і тэхніцы УСУ». Нядаўна Пуцін асабіста хваліўся, што з пачатку 2025 года войскі РФ занялі «амаль пяць тысяч квадратных кіламетраў тэрыторыі і 212 населеных пунктаў».
З дадзеных Bild вынікае, што з пачатку 2025 года Расія акупавала 2395 км² украінскай тэрыторыі. У сваю чаргу ўкраінскі OSINT-праект Deep State паведаміў, што пуцінскія дадзеныя завышаныя больш чым на 100%, і ў параўнанні з агульнай хадой вайны пуцінскія лічбы сведчаць пра мінімальныя поспехі.
Аналітыкі нагадалі, што найбольшых поспехаў у захопе тэрыторый Расія дабілася на пачатку агрэсіі, захапіўшы 108651 км2. З лістапада 2022 года па жнівень 2025 года расійскія сілы захапілі толькі 5842 км2, то бок 0,97 працэнта ўкраінскай тэрыторый, плацячы 167 салдат на км². У выніку за бягучы года Расія страціла 281 550 чалавек забітымі, параненымі на вайне.
Чаму расійская армія замоўчвае гэтыя лічбы і агучвае іншыя несапраўдныя звесткі? Гэта не свядомы самападман, а адмысловая палітыка для запалохвання ўкраінцаў ды Захаду перакананы палітолаг Павал Усаў.
— Яны самі сябе не падманваюць, гэта важны кампанент псіхалагічнага ўздзеяння ад пачатку вайны як на ўласнае грамадства, так і, перш за ўсё, на ўкраінскае. У лютым 2022-га года інфармацыйны аддзел расійскай арміі дэклараваў перамогу, знішчэнне ўсіх сістэм СПА, захоп Кіева, уцёкі камандавання Украіны, казаў пра тое, што ўкраінцы масава здаюцца ў палон.
Калі ж вайна зацягнулася, змяніўся характар інфармацыйнага ўздзеяння, зазначае эксперт.
— Расіяне пачалі дэманізаваць усіх украінцаў, прапагандысты пачалі заклікаць да вынішчэння ўкраінскага народу, называючы ўсіх ва Украіне фашыстамі. Уласным грамадзянам Крэмль пачаў казаць, што змагаецца не з Украінай, дзе ўжо арміі няма, а ваюе з НАТА, якое акупавала Украіну. З'явіліся гісторыі пра польскіх наймітаў і так далей.
Цяпер заявы пра расійскія поспехі скіраваныя на тое, каб дэмаралізаваць Захад, зменшыць падтрымку, якая аказваецца Украіне, перакананы эксперт.
Слухайце размову ў аудыёфайле
Размаўляў Юры Ліхтаровіч