Герой Беларусі і Польшчы атрымаў прызнанне ў Еўропе

Калі ў сераду старшыня Еўрапарламента Раберта Мецола абвясціла двух лаўрэатаў сёлетняй прэміі — беларуса-паляка і грузінку, — сярод антылукашэнкаўскай апазіцыі ў Беларусі і за яе межамі адчувалася змешаная радасць і горыч.

Акцыя ў падтрымку Пачобута ў Беластоку

архіў Беларускай Службы Польскага Радыё

Прэмія імя Сахарава за свабоду думкі, прысуджаная Еўрапейскім парламентам польскаму журналісту з Беларусі Анджэю Пачобуту, асуджанаму судом Лукашэнкі на восем гадоў пазбаўлення волі, зноў ажывіла сярод беларусаў надзею на тое, што пра іх не забыліся ў Еўропе, а іх краіну не спісалі з рахункаў.

Калі ў сераду старшыня Еўрапарламента Раберта Мецола абвясціла двух лаўрэатаў сёлетняй прэміі — беларуса-паляка і грузінку, — сярод антылукашэнкаўскай апазіцыі ў Беларусі і за яе межамі адчувалася змешаная радасць і горыч, бо новы лаўрэат прэміі За Свабоду Думкі, верагодна, не даведаецца пра свае лаўрэацтва ў бліжэйшы час. Ён знаходзіцца ў інфармацыйнай ізаляцыі і рэдка атрымлівае доступ да знешняга свету.

Польшча неаднаразова патрабавала яго вызвалення, але рэжым у Мінску застаецца глухім да гэтых просьбаў. Міністэрства замежных спраў Беларусі неаднаразова заяўляла ў адказ на еўрапейскую крытыку рэпрэсій, што ў краіне няма палітычных зняволеных, і што ўсе асуджаныя — гэта асобы, якія нібыта здзейснілі рэальныя злачынствы.

Пасля больш чым 500 дзён у следчым ізалятары Пачобут быў асуджаны на восем гадоў пазбаўлення волі 

У выпадку з Анджэем Пачобутам гэтае «злачынства» ўключала ў сябе названне савецкага ўварвання ў Польшчу 17 верасня 1939 года актам агрэсіі супраць суверэннай дзяржавы і ўступленне СССР у Другую Сусветную Вайну на баку Гітлера. Пасля больш чым 500 дзён знаходжання ў следчым ізалятары Анджэй Пачобут быў асуджаны на восем гадоў пазбаўлення волі падчас таемнага працэсу ў Гродне. Яго асудзілі за «распальванне нянавісці» — цяперашні тэрмін, які выкарыстоўваецца за выказванне пра гістарычную праўду ў Беларусі.

У сераду беларусы, якія прыязна ставяцца да Польшчы, і палякі павіншавалі сябе і Польшчу ў сацыяльных сетках з прызнаннем гераічных учынкаў польскага журналіста родам з Беларусі. Яны выказалі надзею, што Анджэй Пачобут хутка будзе вызвалены і зможа асабіста атрымаць сваю заслужаную ўзнагароду. Але гэта не абавязкова будзе так — бо нобелеўскі лаўрэат з Беларусі Алесь Бяляцкі, нягледзячы на атрыманне Нобелеўскай прэміі міру, застаецца вязнем Лукашэнкі.

Людзі адчулі, што яны не застаюцца сам на сам з аўтарытарным рэжымам

Тым не менш, нават у Беларусі пасля некалькіх год інтэнсіўных палітычных рэпрэсій, людзі адчулі, што яны не застаюцца сам на сам з аўтарытарным рэжымам, і выказваюць надзею, што гэтая цёмная ноч скончыцца вызваленнем краіны ад дыктатуры, і яе сапраўдныя героі будуць вольныя. Адзін з маіх беларускіх сяброў-журналістаў сказаў прама: «У рэшце рэшт, Польшча не здалася ў мінулым стагоддзі пасля задушэння «Салідарнасці» падчас ваеннага становішча. Мы таксама не павінны — бо без надзеі не можа быць перамогі».

Няхай гэтай надзеі і веры ў вызваленне краіны ад расійскага панавання і яе далучэнне да сям'і еўрапейскіх народаў, якой яна заслугоўвае, хопіць і Анджэю Пачобуту і Алесю Бяляцкаму, а таксама больш чым тысячы іншых сённяшніх беларускіх палітычных зняволеных.

З Беларусі для Польскага Радыё — Ян Кшыштаф Міхалак