На гэтым тыдні ўлады працягвалі арыштоўваць, судзіць, штрафаваць, знявольваць. Людзі працягвалі пратэставаць, ладзіць страйкі. Кардыяхірургі перад пачаткам сваёй працы выйшлі ў ланцуг з пратэстамі супраць гвалту і сфальшаваных выбараў. Іх затрымалі і павезлі ў міліцэйскі пастарунак. Кіраўніца цэнтру кардыяхірургіі паехала ў РУУС і вызваліла адтуль хірургаў. Але складаныя аперацыі на сэрцы ў гэта дзень былі сарваныя.
Пратэставалі студэнты. Іх выключалі з ВНУ.
Прайшла ноч расстраляных паэтаў. Традыцыйныя арганізатары – Дашкевіч, Севярынец – сядзелі за кратамі.
«Гэта вельмі важна вам, як ваенным людзям – парадак у абласцях», – падкрэсліў беларускі лідар. Ён адзначыў, што ў кампетэнцыю памочнікаў, у прыватнасці, Валерыя Вакульчыка ў Брэсцкай вобласці і Юрыя Караева ў Гродзенскай, будзе ўваходзіць армейскі складнік: «Дэсантна-штурмавая брыгада ў Брэсце на гэта арыентавана ў адпаведнасці з законам. І велізарная мотастралковая брыгада разгорнутая ў Гродне. Гэта апора ваша і сілавікоў, губернатараў там. Сілавы складнік. Я гэта адкрыта гавару і не хаваю. Усе павінны гэта разумець».
Лукашэнка таксама паставіў задачу па ўзаемадзеянні памочнікаў з Міністэрствам абароны, МУС, КДБ у цэнтры. «Асабліва з Мінабароны. Каб вы бачылі, чулі і разумелі, што адбываецца на граніцы і за мяжой. Каб вы своечасова мяне праінфармавалі. І калі трэба вас падтрымаць Узброенымі Сіламі, як гэта было летам, мы гэта зробім. Гэта ў маёй кампетэнцыі. І дапамога ўпраўленням КДБ і МУС. Ім трэба аказаць дапамогу», – даручыў кіраўнік дзяржавы.
Лукашэнка падрабязна пракаментаваў сітуацыю ў Польшчы:
«Яны хацелі ў нас рэвалюцыю зладзіць, нават не рэвалюцыю, а мяцеж, а атрымалі самі. Там сітуацыя няпростая, і яна проста так не вылезе. Там не адмарозкі падняліся, а падняліся жанчыны, і зразумела, за што падняліся. Там падняліся сяляне, і яны ведаюць, за што падняліся. Там рабочыя падняліся, ведаюць за што, дзяржслужачыя, – сказаў Лукашэнка. – Жанчыны падняліся і пачалі пратэставаць не таму, што толькі аборты [забаранілі]. Гэта быў спускавы кручок.
Дуда перамог у Польшчы, сфальсіфікаваўшы выбары. Там нават адсотка перавагі не было. Сфальсіфікаваў. І адтуль усё пачалося. Яны хацелі стрэлкі перавесці на нас. А палякі не дурні, і там гэта [пратэсты] усё пачалося».
Акрамя таго, у Польшчы накапіліся і эканамічныя праблемы.
«Так, там ёсць купка багатых, але колькі там бедных. І разрыў паміж беднатой і багатымі велізарны. Гэта самае небяспечнае для любой дзяржавы», – дадаў ён.
Паводле БСПР, работнікі прадпрыемстваў Польшчы, на якіх працуе не менш за дзесяць чалавек, у сярэднім зарабляюць у месяц 5371 злоты (каля 1193 еўра, на сёння гэта 3 640 беларускіх рублёў) без выліку падаткаў.
Аляксандр Лукашэнка таксама пракаментаваў намер некаторых студэнтаў з'ехаць вучыцца за мяжу. «Нехта хоча паехаць за мяжу вучыцца. Абвяшчаюць там палякі, літоўцы і іншыя. Не пытанне. Заўтра выпішам квіткі, хай едуць. Але толькі ў Лінгвістычным універсітэце вучаць замежным мовам. Паверце, у Польшчы, Чэхіі і нават у Літве людзей, якія ўмеюць размаўляць на замежных, англійскай ці нямецкай, мовах, дастаткова, – звярнуў увагу Лукашэнка. – Кагосьці там пакінуць – аднаго-двух чалавек, і тое фізікаў, матэматыкаў, таленавітых».
Пяць 17-гадовых студэнтаў сталічнага ўніверсітэту былі затрыманыя 27 кастрычніка пасля акцыі салідарнасці са студэнтамі, якія страйкуюць у дворыку БДУ паміж юрфакам і хімфакам. Чацвёра з іх былі жорстка збітыя сілавікамі ў міліцэйскім аўтобусе, пасля чаго ў бальніцы ўсім дыягнаставалі страсенне галаўнога мозгу, а некаторым – чэрапна-мазгавыя траўмы, пералом носа і іншыя траўмы. На чатырох студэнтаў у Кастрычніцкім РУУСе былі складзеныя пратаколы па двух артыкулах КаАП: 23.34 (удзел у несанкцыянаваным масавым мерапрыемстве) і 23.4 (непадпарадкаванне законнаму распараджэнню ці патрабаванню службовай асобы пры выкананні ёй службовых паўнамоцтваў). Студэнт і студэнтка распавялі праваабаронцам, як яны сутыкнуліся з жорсткасцю сілавікоў.
На сваёй старонцы ў інтэрнэце Пазняк заклікаў, каб менавіта ў Курапаты накіраваліся ўдзельнікі маршу, якія кожную нядзелю адбываюцца ў Менску.
«1-га лістапада на Дзяды – у Дзень усіх святых і ў Дзень памяці продкаў павінен быць марш памяці ў Курапаты. Цемра мусіць сканаць перад духам тысячаў беларусаў. Ідзіце ў Курапаты на Дзяды! Шануйце памяць, каб мець будучыню» – напісаў Зянон Пазняк, адкрывальнік праўды пра Курапаты, як месца масавых камуністычных рэпрэсіяў.
Уладзмір Падгол